Dünya bazarında neft qiymətləri gün ərzində qeydə alınan ən yüksək səviyyələrdən sonra geriləyərək aşağı diapazonda ticarət olunub.
Məlumata görə, “Brent” və “WTI” markalı neft fyuçersləri əvvəlcə kəskin bahalaşaraq 95 ABŞ dollarına qədər yüksəlib, daha sonra isə 91 dollar səviyyəsinə enib.
Bildirilib ki, qiymətlərin enməsinə İranın İsraillə hərbi əməliyyatları dayandırdığını açıqlaması təsir göstərib. ABŞ Prezidenti Donald Tramp da İran və İsrail arasında atəşkəsə yaxınlaşma və Vaşinqtonla Tehran arasında danışıqlarda irəliləyiş olduğunu qeyd edib. Bu isə Fars körfəzindən neft ixracının pozulması ilə bağlı narahatlıqları azaldıb.
Eyni zamanda İsrail tərəfinin də müvəqqəti atəşkəsə əməl edəcəyi ilə bağlı siqnallar verdiyi, bunun isə bazarlarda risk gözləntilərini azaltdığı bildirilir.
Digər tərəfdən, OPEC+ ölkələri iyul ayı üçün gündəlik neft hasilatı kvotalarını 188 min barel artırmaq barədə qərar qəbul edib. Qərarın regionda geosiyasi gərginliklərə baxmayaraq, qlobal təklif tərəfinə əlavə təzyiq yaratdığı qeyd olunur.
Mütəxəssislər həmçinin Çinin neft idxalında müşahidə olunan azalma və ehtiyatlardan istifadəyə üstünlük verməsini də qiymət artımını məhdudlaşdıran amillər sırasında göstərirlər.
Analitiklərin fikrincə, qlobal enerji bazarında volatillik yüksək olaraq qalır və qiymətlərin yaxın günlərdə geosiyasi xəbərlərə həssas şəkildə dəyişəcəyi gözlənilir.
MONETAR.AZ
