Qlobal kriptovalyuta bazarı şənbə günü növbəti satış dalğasına məruz qalıb. Dünyanın ən böyük rəqəmsal aktivi olan Bitcoin (BTC), Yaxın Şərqdə yenidən alovlanan geosiyasi gərginliklər və ABŞ-dakı tənzimləmə qeyri-müəyyənliyi fonunda investorların riskli aktivlərdən qaçması səbəbindən kəskin dəyər itirib.
Bakı vaxtı ilə saat 13:15-ə olan birja məlumatlarına əsasən, aparıcı kriptovalyuta son 24 saat ərzində 3,42% ucuzlaşaraq 74 654,2 dollar səviyyəsinə düşüb. Bununla da, həftənin əvvəlində 78 550 dollarlıq mühüm müqavimət səddini qırmağa çalışan Bitcoin istiqamətini yenidən aşağıya doğru dəyişib.
Bitcoin ötən ilin oktyabrında qeydə alınmış 126 100 dollarlıq tarixi rekord zirvəsindən sonra korreksiya mərhələsindədir. Hazırkı geosiyasi dalğalanmalar isə qısamüddətli treyderlərin təşvişini daha da artırır. Həftənin ilk günlərində korporativ alışlar və ETF (birja investisiya fondu) daxilolmaları fonunda 78 550 dollar səviyyəsi test edilsə də, burada cəmləşən güclü satış sifarişləri qiyməti geriyə itələyib.
Analitiklər qeyd edirlər ki, 74 000 – 75 000 dollar diapazonu psixoloji və texniki baxımdan çox mühüm dəstək zonasıdır. Bu səviyyənin aşağı doğru qırılması satış təzyiqini daha da dərinləşdirə bilər.
Kripto investisiyalarında risk iştahasını minimuma endirən və treyderləri nağd vəsaitlərə (stabilkoinlərə və ya qızıla) yönəldən əsas səbəblər aşağıdakılardır:
-
Vaşinqton-Tehran xəttində geosiyasi gərginlik: ABŞ və İran arasında regionun gələcəyi və xüsusilə Hörmüz boğazının tranzit təhlükəsizliyi ilə bağlı aparılan diplomatik danışıqların qeyri-müəyyən mühiti bazarda gərginliyi pik həddə çatdırıb. Treyderlər diplomatik masadan mənfi nəticə çıxacağı təqdirdə qlobal tədarük zəncirinin və neft bazarlarının sarsılacağından qorxurlar ki, bu da birbaşa kripto kimi spekulyativ aktivlərdən vəsait çıxışına (outflow) səbəb olur.
-
ABŞ-da tənzimləmə (Requlyasiya) dumanı: Vaşinqtonun rəqəmsal aktivlərin hüquqi çərçivəyə salınması, xüsusilə kripto birjalarının fəaliyyəti və hibrid aktivlərin vergiləndirilməsi ilə bağlı atacağı növbəti institusional addımlar bazar iştirakçıları tərəfindən ehtiyatla gözlənilir.
MONETAR.AZ
