Böyük Britaniyanın Baş naziri Endi Börnem Avropa İttifaqı ilə münasibətlərin yenidən qurulması çərçivəsində qarşılıqlı faydalı razılaşmanın əldə edilməsinin mümkün olduğunu bildirib. Onun fikrincə, hazırlanacaq saziş 2016-cı ildə Brexit-ə səs verən britaniyalıların gözləntilərinə daha uyğun ola bilər.
Börnem bu açıqlamanı Dublində keçirilən Avropa Siyasi Birliyinin sammitində digər ölkələrin liderləri ilə görüşü zamanı verib. Danışıqlar gələn həftə baş tutacaq Böyük Britaniya–Aİ sammiti ərəfəsində aparılır. London həmin görüşdə bir sıra yeni sazişlər vasitəsilə Avropa ilə iqtisadi və siyasi əlaqələri dərinləşdirməyə ümid edir.
İkitərəfli sammitin əsas gündəliyinə ərzaq və içki ticarəti, emissiya kvotalarının alqı-satqısı və gənclər üçün mobillik proqramı üzrə razılaşmaların yekunlaşdırılması daxildir. Bununla belə, avropalı tələbələrin Böyük Britaniyada təhsil haqqı məsələsi hələ də açıq qalır.
Börnem tərəflərin ortaq maraqlarına cavab verən saziş əldə edə biləcəyinə inandığını bildirib. Eyni zamanda, razılaşmanın hələ yekunlaşmadığını vurğulayaraq qarşıdakı yeddi gün ərzində intensiv danışıqların aparılacağını qeyd edib.
Baş nazirin sözlərinə görə, Britaniya ilə Avropa arasında münasibətlərin yenidən qurulmasının əsas məqsədi daha sıx əməkdaşlığa qayıtmaq imkanlarını araşdırmaqdır. O, həmçinin Brexit nəticəsində ölkənin 2016-cı il referendumunda seçicilərin gözlədiyindən daha sərt ayrılma modeli ilə üzləşdiyini bildirib.
Avropa İttifaqı avropalı tələbələrə Britaniya universitetlərində yerli tələbələrlə eyni, daha aşağı təhsil haqqı ilə oxumaq imkanı verilməsi məsələsini digər razılaşmalarla əlaqələndirə biləcəyinə işarə edib. Bu məsələ həll olunmadığı təqdirdə ərzaq və içki ticarəti, eləcə də emissiya kvotaları üzrə sazişlərin qüvvəyə minməsi sual altında qala bilər.
Börnem bütün razılaşmaların vahid paket təşkil etdiyini desə də, məsələlərin bir-birinə bağlanması ilə bağlı konkret mövqe açıqlamayıb. O, qarşıdakı həftə ərzində Britaniya üçün nəzərdə tutulan üstünlüklərin əldə olunması uğrunda mübarizə aparacağını vurğulayıb.
Baş nazir daha əvvəl ərzaq və içki ticarəti üzrə sazişin Brexit-dən sonra yaranmış inzibati maneələri azaldacağını və Böyük Britaniyanın ümumi daxili məhsuluna (ÜDM) 0,4% əlavə edə biləcəyini bildirmişdi.
Britaniya hökumətinin başçısı keçmiş Baş nazir Devid Kemeronun ölkənin iqtisadi problemlərinin Brexit-lə əlaqəli olmadığı barədə son açıqlamalarına da münasibət bildirib.
Börnem Kemeronun bu mövqeyi ilə razılaşmadığını deyərək son onillikdə Böyük Britaniyada müşahidə olunan zəif iqtisadi artımın Brexit-lə heç bir əlaqəsinin olmadığını iddia etməyin faktlara uyğun gəlmədiyini qeyd edib.
Avropa İttifaqının xarici siyasət və təhlükəsizlik məsələləri üzrə ali nümayəndəsi Kaya Kallas da cümə axşamı Britaniyanı yenidən Aİ-nin tərkibində görmək istədiyini bildirib. Bununla belə, o, Brexit dövrünün yaratdığı siyasi və institusional gərginlikdən sonra danışıqların asan keçməyəcəyi barədə xəbərdarlıq edib.
Gələn həftə keçiriləcək sammitdə tərəflər arasında əməkdaşlığın digər istiqamətləri də müzakirə olunacaq. Gündəliyin əsas mövzularından birinin birgə miqrasiya paktı üzrə növbəti danışıqlar raundu olacağı gözlənilir.
Bundan başqa, hüquq-mühafizə və sərhəd nəzarəti sahəsində əməkdaşlığın genişləndirilməsi, qastrol səfərlərinə çıxan sənətçilər üçün viza rejimi və peşə ixtisaslarının qarşılıqlı tanınması məsələləri də nəzərdən keçiriləcək.
MONETAR.AZ
