ABŞ Federal Ehtiyat Sisteminin (FED) faiz dərəcələrini dəyişməz saxlaması və bunun sənaye tələbatı ilə bağlı narahatlıqları qismən azaltması fonunda mis, alüminium və sink qiymətləri yüksəlib. Bu barədə Bloomberg məlumat yayıb.
Əlvan metallar FED-in iclası ərəfəsində ehtiyatlı ticarət olunurdu. Buna ABŞ-İran qarşıdurmasının kəskinləşməsinin inflyasiya risklərini artırması və FED-in faiz dərəcələrini yüksəldə biləcəyi ilə bağlı gözləntilər səbəb olmuşdu. Borclanma xərclərinin artması adətən iqtisadi fəallığı və istehlakı zəiflədir ki, bu da metallardan xammal kimi istifadə edən sənaye sahələrinin tələbatına mənfi təsir göstərir.
Bununla belə, FED-in qərarı yekdil olmayıb. Komitənin 12 üzvündən 3-ü inflyasiya ilə mübarizə məqsədilə faiz dərəcəsinin 25 bazis bəndi artırılmasının lehinə səs verib.
Şanxay vaxtı ilə saat 12:25-ə olan məlumata görə, misin qiyməti 0,6% artaraq bir ton üçün 13 657 dollara yüksəlib. Alüminium 0,2%, sink isə 0,5% bahalaşıb.
Londonda isə metalların əksəriyyəti aylıq mülayim artıma doğru irəliləyir. Bazar iştirakçılarının fikrincə, fiziki bazarda tədarükün məhdud qalması makroiqtisadi və geosiyasi riskləri, o cümlədən Yaxın Şərqdə yenidən alovlanan münaqişənin təsirlərini kompensasiya edir. İnvestorlar ABŞ-ın İrana son zərbələrini böyük ölçüdə qiymətlərə daxil ediblər. Çərşənbə axşamı neft qiymətlərinin geriləməsi də risk iştahını qismən dəstəkləyib.
Bu həftə mis bazarında təklif çatışmazlığı ilə bağlı siqnallar müəyyən qədər zəifləsə də, bəzi göstəricilər gərginliyin davam etdiyini göstərir. Çində mis idxalı üzrə Yangshan premiumu ötən həftə qeydə alınan 2022-ci ildən bəri ən yüksək səviyyə olan 115 dollardan bir ton üçün 112 dollara geriləyib.
MONETAR.AZ
