“Atəşgah Sığorta” ASC 2026-cı ilin 6 ayı üzrə maliyyə hesabatını açıqlayıb. Hesabata əsasən, şirkətin ümumi gəlirləri ötən ilin müvafiq dövrü ilə müqayisədə 35 milyon 537,8 min manatdan 35 milyon 663,4 min manata yüksələrək 125,5 min manat artıb.
Artım əsasən investisiya gəlirlərinin hesabına formalaşıb. Belə ki, investisiya gəlirləri 1 milyon 190,9 min manatdan 1 milyon 417,4 min manata yüksəlib. Bununla yanaşı, əsas əməliyyat gəlirləri də 35 milyon 430,7 min manat təşkil edib.
Bunun əksinə olaraq, şirkətin xərcləri daha yüksək templə artıb. Ümumi xərclər bir il ərzində 33 milyon 627,2 min manatdan 36 milyon 657,5 min manata yüksələrək 3 milyon manatdan çox artım göstərib.
Ən böyük artım əsas əməliyyat xərclərində qeydə alınıb. Bu istiqamətdə xərclər 21 milyon 681,7 min manatdan 24 milyon 792,2 min manata çatıb. İşlərin aparılması xərcləri isə 11 milyon 921,4 min manatdan 11 milyon 638,2 min manata enib.
Nəticədə ötən ilin eyni dövründə 1 milyon 528,5 min manat xalis mənfəət əldə edən şirkət cari ilin ilk yarısını 994,1 min manat xalis zərərlə başa vurub. Maliyyə nəticəsi üzrə dəyişiklik 2,3 milyon manatdan çox olub.
Şirkətin öhdəlikləri də artım nümayiş etdirib. 30 iyun 2026-cı il tarixinə ümumi öhdəliklər 53 milyon 167,2 min manat təşkil edib. Bu, ötən ilin eyni dövrü ilə müqayisədə 1 milyon 291 min manat və ya təxminən 2,5 faiz çoxdur.
Artım əsasən sığorta ehtiyatlarının və təkrarsığorta əməliyyatları üzrə kreditor borclarının yüksəlməsi ilə əlaqədardır. Sığorta ehtiyatları 47 milyon 889,9 min manata, kreditor borcları isə 3 milyon 506,2 min manata çatıb.
Eyni zamanda, şirkətin kapitalı azalıb. Hesabat dövrünün sonunda ümumi kapital 16 milyon 127,6 min manat olub ki, bu da ötən ilin müvafiq dövrü ilə müqayisədə 1 milyon 417,3 min manat azdır.
Bölüşdürülməmiş mənfəət 6 milyon 12,2 min manatdan 4 milyon 471,4 min manata enib. Bununla yanaşı, yenidən qiymətləndirmə üzrə ehtiyatlar 6 milyon 647,7 min manata yüksəlib.
Maliyyə göstəriciləri onu göstərir ki, gəlirlərdə cüzi artım olsa da, əməliyyat xərclərinin sürətlə yüksəlməsi “Atəşgah Sığorta”nın cari ilin ilk yarısını zərərlə başa vurmasına səbəb olub. Bununla yanaşı, öhdəliklərin artması və kapitalın azalması şirkətin maliyyə vəziyyətində əvvəlki illə müqayisədə zəifləmə tendensiyasının yarandığını göstərir.
MONETAR.AZ
