Meta Platforms şirkətinin baş icraçı direktoru (CEO) Mark Zukerberq ABŞ administrasiyasını süni intellekt sahəsində rəqabət aparmaq məqsədilə Çin süni intellekt modellərinə çıxışı məhdudlaşdırmamağa çağırıb.
Financial Times-a verdiyi müsahibədə Zukerberq bildirib ki, Çin texnologiyalarının bloklanması ABŞ-ın süni intellekt yarışında üstünlük qazanması üçün “səmərəli həll yolu” deyil.
Meta rəhbəri ABŞ daxilində süni intellekt şirkətlərinin rəqabəti zəiflədə biləcək “tənzimləyici mənimsəmə” (regulatory capture) riskinə diqqət çəkib. Onun sözlərinə görə, bazarda sağlam rəqabətin qorunması və innovasiyaların inkişafı üçün əsas maneələr sistemli şəkildə müəyyən edilməli və aradan qaldırılmalıdır.
Zukerberq qeyd edib ki, ABŞ şirkətləri Çinlə daha uğurlu rəqabət aparmaq üçün sənayedəki darboğazları və inkişafı məhdudlaşdıran amilləri müəyyən etməlidirlər.
Meta rəhbəri süni intellekt sistemlərinin ekspert yoxlamasından keçirilməsinin də faydalı ola biləcəyini bildirib. Onun fikrincə, bu proses yalnız səriştəli mütəxəssislərin iştirakı ilə düzgün təşkil edildiyi halda sənayenin inkişafına töhfə verə bilər.
Zukerberq həmçinin xəbərdarlıq edib ki, ən güclü süni intellekt alətlərinə çıxışın məhdudlaşdırılması kibertəhlükəsizlik problemlərinin həlli üçün düzgün yanaşma deyil. O vurğulayıb ki, bu texnologiyalar şirkətlərə yalnız risk yaratmır, eyni zamanda sistemlərdəki zəiflikləri aşkar etmək və aradan qaldırmaq üçün də istifadə oluna bilər.
MONETAR.AZ
