Birbank kiberdələduzluğa qarşı
Eldəniz Əmirov: Avtobuslarda gediş haqqının 1 manat olması yolverilməzdir
29 Avqust 2025
11:02
İqtisadçı Eldəniz Əmirov sosial şəbəkə hesabında avtobuslarda gedişhaqqının 1 manat olacağı ilə bağlı yayılan şayiələrlə bağlı fikirlərini bildirib. Əmirov qeyd edib ki, bu ictimai rəyi öyrənmək üçün atılan bir manevrdirsə, yolverilməzdir: "Xatırlatmaq istəyirəm ki, bir müddət öncə gedişhaqqı 50 qəpiyə qalxdığı zaman əksəriyyət etiraz edəndə, mən etiraz etmədim. Vətəndaş kimi daha ucuz qiymətin tərəfdarı olsam da, iqtisadçı kimi bilirdim ki, 50 qəpiyin iqtisadi əsası var və bu, olmalıdır. Amma 1 manatlıq gedişhaqqı artıq yol verilməzdir.
Bu gün paytaxtın girişində, çıxışında, mərkəzində, hətta on zolaqlı yollarında belə tıxaclar müşahidə olunur. İnsanlar Bakı ətrafında daha çox yaşayır, işləmək üçün isə şəhərə üz tutur. Bir ailədən 3–4 nəfər işə və təhsil müəssisəsinə getmək üçün gündə bir neçə marşrut dəyişir. Orta statistik hesabla, bir ailənin 3 üzvü 2 marşrut dəyişsə, gündəlik nəqliyyat xərcləri minimum 12 manat, 22 iş günü olan bir ayda isə 264 manat edir. Əgər ailədən 4 nəfər çıxsa və bəziləri əlavə marşrutdan istifadə etməli olsa, analoji hesablama ilə ailənin aylıq nəqliyyat xərci 400 manata çatır. Yəqin ki, bu rəqəm hamıya tanışdır – minimum əmək haqqının miqdarıdır. Hətta bir ailədən yalnız 2 nəfər çıxıb hərəsi 2 marşrut dəyişsə belə, bu, ayda 200 manata yaxın xərc deməkdir.
Əlqərəz, əgər kimlərsə nəbzi yoxlamaq məqsədilə belə bir manevr edirsə, yekunda bu niyyət yuxarı qərarvericilər tərəfindən dəstəklənməməlidir."
