Yaponiyada xidmət sektorunda istehsalçı qiymətlərinin artım tempi iyul ayında proqnozları üstələyib. Yaponiya Bankının açıqladığı məlumatlar şirkətlərin artan xərcləri müştərilərə ötürmək imkanlarının genişləndiyini və inflyasiya təzyiqlərinin davam etdiyini göstərir.
Məlumata görə, şirkətlərin bir-birinə göstərdiyi xidmətlərin qiymətlərini əks etdirən Korporativ Xidmət Qiymətləri İndeksi (CSPI) iyul ayında illik ifadədə 3,6% artıb. Bu, analitiklərin gözlədiyi 3,2%-lik artımdan yüksək olmaqla yanaşı, iyun ayı üzrə 3,4%-lik dəqiqləşdirilmiş göstəricini də üstələyib.
Yeni statistika Yaponiyada istehlak qiymətlərinin də iyul ayında sürətlə artdığını göstərən son məlumatlardan sonra açıqlanıb. Analitiklərin fikrincə, zəif yen kursu və ABŞ ilə İsrailin İrana qarşı hərbi əməliyyatları fonunda bahalaşan idxal məhsulları şirkətlərin xərclərini artırıb və bu xərclər tədricən son istehlak qiymətlərinə ötürülür.
Hökumətin tətbiq etdiyi subsidiyalar qiymət artımının bir hissəsini kompensasiya etsə də, ölkədə inflyasiya son aylarda yüksəliş meylini qoruyub saxlayır.
Ekspertlər hesab edirlər ki, xidmət sektorunda qiymət artımının gözləniləndən yüksək olması Yaponiya Bankının pul-kredit siyasətini daha da sərtləşdirə biləcəyinə dair gözləntiləri gücləndirib. Bazar iştirakçıları bu məlumatların fonunda tənzimləyicinin sentyabr ayında faiz dərəcələrini artırmaq ehtimalını daha yüksək qiymətləndirirlər.
MONETAR.AZ
