Bu gün Asiya valyutaları qarışıq dinamika nümayiş etdirib. ABŞ dolları isə ABŞ-də açıqlanan inflyasiya göstəricilərinin gözləntiləri üstələməsindən sonra son bir həftənin ən yüksək səviyyələrinə yaxın mövqeyini qoruyub. Güclü inflyasiya göstəriciləri Federal Ehtiyat Sisteminin (FED) faiz dərəcələrini yenidən artıracağına dair gözləntiləri gücləndirib. İnvestorların diqqəti isə pul-kredit siyasətinə dair yeni siqnallar əldə etmək üçün Cekson-Houl simpoziumuna yönəlib.
Bakı vaxtı ilə saat 08:43-ə olan məlumata görə, ABŞ dollarının indeksi (DXY) əvvəlki sessiyada 0,3% yüksəldikdən sonra 99,15 səviyyəsində sabit qalıb.
ABŞ-də şəxsi istehlak xərcləri (PCE) indeksi iyul ayında illik ifadədə 3,7% artaraq iyun ayının göstəricisini təkrarlayıb və 3,6%-lik bazar proqnozunu üstələyib. Aylıq ifadədə isə qiymətlər 0,2% artaraq yenə də gözləntilərdən yüksək olub.
Bu göstəricilər FED-in sərt pul-kredit siyasətini davam etdirməsi ehtimalını artırıb. CME FedWatch alətinin məlumatına görə, bazarlar sentyabr iclasında faiz dərəcəsinin artırılması ehtimalını təxminən 60% səviyyəsində qiymətləndirirlər.
Analitiklərin fikrincə, ABŞ-də inflyasiyanın yüksək səviyyədə qalması fonunda valyuta bazarları ABŞ dövlət istiqrazlarının gəlirliliyindəki dəyişikliklərə və FED-in gələcək siyasətinə dair gözləntilərə həssas olaraq qalacaq.
İnvestorlar indi əsas diqqəti FED sədri Kevin Uorşun Cekson-Houl simpoziumundakı çıxışına yönəldiblər. Bazarda onun gələcək faiz qərarlarının vaxtı və miqyası ilə bağlı ipucları verəcəyi gözlənilir.
Yapon yeni sabit qalıb. USD/JPY məzənnəsi demək olar ki, dəyişməyərək 159,36 səviyyəsində ticarət olunub. Buna səbəb Yaponiya Bankı sədrinin müavini Ryodzo Himinonun faiz dərəcələrinin vaxtında artırılmasının inflyasiyanın sürətlənməsinin qarşısını ala biləcəyini bildirməsi, lakin sentyabr ayında mümkün addımla bağlı konkret siqnal verməməsi olub. Bazar iştirakçıları gələn ay faiz artımı ehtimalını təxminən 86% qiymətləndirirlər.
Cənubi Koreya vonu günün ən güclü valyutalarından biri olub. USD/KRW məzənnəsi 0,3% geriləyib. Buna Cənubi Koreya Bankının uçot dərəcəsini ardıcıl ikinci dəfə 25 baza bəndi artıraraq 3%-ə çatdırması səbəb olub.
Mərkəzi Bank, həmçinin 2026-cı il üzrə iqtisadi artım proqnozunu 2,6%-dən 3,3%-ə yüksəldib, inflyasiya proqnozunu isə 2,7% səviyyəsində saxlayıb.
Tənzimləyici gələcəkdə də pul-kredit siyasətinin sərtləşdirilməsinin mümkün olduğunu bildirsə də, növbəti addımların ehtiyatla və mərhələli şəkildə atılacağını vurğulayıb. Yenilənmiş proqnozlar ilin sonuna faiz dərəcəsinin 3,25%-ə yüksələ biləcəyini göstərir ki, bu da vona əlavə dəstək verir.
Avstraliya dolları da bahalaşıb. AUD/USD məzənnəsi Avstraliyada inflyasiya göstəricilərinin gözləntiləri üstələməsindən bir gün sonra 0,2% artaraq 0,718 ABŞ dollarına yüksəlib. Bu məlumatlar Avstraliya Ehtiyat Bankının cari il ərzində yenidən faiz dərəcəsini artıracağına dair bazar gözləntilərini gücləndirib.
Digər Asiya valyutaları arasında Çin yuanı (USD/CNY) demək olar ki, dəyişməz qalıb, Sinqapur dolları (USD/SGD) isə 0,1% möhkəmlənib.
Hindistan rupisi zəifləyib və USD/INR məzənnəsi 0,2% yüksəlib.
MONETAR.AZ
