Dünya əhalisinin 28 faizi

Dünya əhalisinin 28 faizi sağlam qidalanmaqda çətinlik çəkir

30 İyul 2025 01:53

2024-cü ildə dünyada aclıqla mübarizədə bəzi irəliləyişlər əldə olunub, lakin COVID-19 pandemiyası və digər qlobal böhranlar nəticəsində 2017-2021-ci illər arasında qidalanmayan insanların sayı artıb. Ukraynadakı müharibə və inflyasiya böhranı kimi qlobal çətinliklər fonunda isə 2024-cü ildə də ərzaq çatışmazlığı yüksək səviyyədə qalır.

BMT-nin hesabatında qeyd edilir ki, ən çox kəskin ərzaq çatışmazlığı ilə üzləşən ölkələr arasında Nigeriya, Sudan və Konqo Demokratik Respublikası ön sıradadır. Əhalinin ən yüksək faizinin aclıqla üzləşdiyi ölkələr isə Fələstin (Qəzza zolağı), Cənubi Sudan, Sudan, Yəmən və Haitidir. Bu göstəricilər BMT-nin 2030-cu ilədək aclığı tamamilə aradan qaldırmaq hədəfinə 2017-ci ildən daha uzaqlaşdığını göstərir.

Dünən təqdim olunan “Qida Təhlükəsizliyi və Qidalanma Dünyada” hesabatında Dünya Qida Proqramının rəhbəri Qu Dongyu bildirib: “Qlobal aclıq səviyyəsində azalma müşahidə olunması ümidvericidir, lakin irəliləyiş bərabər paylanmayıb”. O, aclıq probleminin davam etdiyi regionlarda beynəlxalq əməkdaşlığın gücləndirilməsinin vacibliyini vurğulayıb.

Keçən il dünyada qidalanmayan insanların sayı üçüncü il ardıcıl azalaraq orta hesabla 673 milyon nəfərə çatıb ki, bu da dünya əhalisinin 8,2 faizini təşkil edir. Aclıq ən çox Afrika qitəsində yayılıb və orada əhalinin 20 faizi aclıqdan əziyyət çəkir. Asiyada isə bu göstərici 6,7 faizdir. Ümumilikdə, 2,3 milyard insan, yəni dünya əhalisinin 28 faizi davamlı olaraq sağlam qidalanmaqda çətinlik çəkir.

monetar.az