Bloomberg yazır ki, ticarət həftəsinin əvvəlində misin qiymətləri tədarük riskləri ilə bağlı narahatlıqlar və dolların zəifləməsi fonunda artaraq yeni rekorda yaxınlaşıb.
Londonda etalon fyuçerslər 1,9% bahalaşaraq bir ton üçün 13 243,50 dollara çatıb. Bu artım metallar bazarında genişmiqyaslı rallinin bir hissəsidir; nəticədə alüminium və qalay qiymətləri 2022-ci ildən bəri ən yüksək səviyyələrə yüksəlib.
Noyabrın ortalarından bəri misin qiyməti 20%-dən çox artıb. Buna səbəb kimi ABŞ-də Tramp administrasiyasının idxal rüsumları ilə bağlı qərarından əvvəl metalın aktiv şəkildə ölkəyə gətirilməsinin dünyanın digər bölgələrində təklif çatışmazlığı yarada biləcəyi gözləntiləri göstərilir.
Eyni zamanda, son aylarda mədənlərdə baş verən qlobal fasilələr də qiymətləri dəstəkləyib. Bu amil qlobal elektrikləşmədə əsas rol oynayan metal üzrə təklifin artan tələbi qarşılaya bilməyəcəyi ilə bağlı narahatlıqları gücləndirib.
İnvestorlar həmçinin ABŞ Ədliyyə Nazirliyinin Federal Ehtiyat Sisteminə (FED) qarşı cinayət ittihamı irəli sürə biləcəyi təhdidinin nəticələrini qiymətləndirirlər. FED-in sədri Cerom Pauell bunu Tramp administrasiyasının faiz dərəcələri üzrə qərarlara təsir göstərmək kampaniyasının bir hissəsi kimi dəyərləndirib. Dolların ucuzlaşması xammal bazarlarını dəstəkləyib.
Yeni il dövründə metallar inamlı artım nümayiş etdirir: LMEX ümumi indeksi ardıcıl dördüncü həftədir yüksəlir və avqustdan bəri ən uzun artım seriyasını göstərir. İnvestorlar ABŞ-də pul-kredit siyasətinin yumşaldılması, dolların zəifləməsi və tədarük zəncirlərinin parçalanmasından fayda görən real aktivlərə fəal şəkildə vəsait yatırırlar.
Ötən həftə mis yeni zirvəyə çatıb, cümə günü isə alüminium və nikel kəskin bahalaşıb.
Comex anbarlarında mis ehtiyatları ardıcıl 42 həftədir artır və rekord səviyyəyə çatıb. Bu, mümkün rüsumlar ərəfəsində treyderlərin ABŞ-yə tədarükləri artırması ilə bağlıdır.
MONETAR.AZ
