Apple 2011-ci ildən bəri ilk dəfə olaraq dünyanın ən böyük smartfon istehsalçısı adını qaytarmağa hazırlaşır. Analitik agentlik Counterpoint Research-in məlumatına görə, şirkətin uğuru iPhone 17 seriyasının uğurlu debütü və istifadəçilərin kütləvi şəkildə cihazlarını yeniləməsi ilə bağlıdır, — deyə Bloomberg yazır.
Sentyabrda satışa çıxan iPhone 17 modelləri həm ABŞ-da, həm də Çində böyük populyarlıq qazanıb. Tədqiqatçıların məlumatına görə, bu, hər iki regionda satışların illik ifadədə iki rəqəmli artımına səbəb olub. ABŞ və Çin arasında ticarət gərginliyinin azalması və dolların ucuzlaşması da Apple məhsullarını inkişaf etməkdə olan bazarlarda daha əlçatan edib.
Bu sıçrayış Apple-ın artıq cari ildə özünün uzunmüddətli rəqibi Samsung-u geridə qoymasına imkan verəcək. İl ərzində iPhone tədarükünün 10% artacağı gözlənilir, Samsung-un tədarük artımı isə cəmi 4,6% olacaq. Bu isə Apple-a qlobal bazarın 19,4%-nə sahib olmaq imkanı yaradacaq.
“iPhone 17 seriyasına bazarın son dərəcə müsbət münasibəti ilə yanaşı, proqnozların artırılmasının əsas səbəbi cihazların yenilənmə dövründə dönüş nöqtəsinə çatmağıdır”, – deyə Counterpoint analitiki Yan Van bildirib.
Onun sözlərinə görə, Covid-19 pandemiyası dövründə smartfon alan istehlakçılar artıq cihazları yeniləmə mərhələsinə daxil olurlar. Bundan əlavə, 2023-cü ildən 2025-ci ilin ikinci rübünə qədər 358 milyon ədəd istifadə olunmuş iPhone satılıb və həmin istifadəçilər də yaxın zamanda yeni modellərə keçməyə hazırdır.
Analitiklər əmindirlər ki, güclü məhsul xəttinə görə Apple 2029-cu ilə qədər liderliyini qoruyub saxlayacaq. 2026-cı ildə qatlanan iPhone-un debütü, 2027-ci ildə isə Apple smartfonlarının dizaynında genişmiqyaslı yenilənmə gözlənilir.
Ötən ay Apple artıq bildirmişdi ki, satışlar gözləntiləri üstələyir: bayram kvartalında gəlirin 140 milyard dollarlıq rekord göstəriciyə yaxınlaşacağı ehtimal olunur.
MONETAR.AZ
