Açıqlanan məlumatlara əsasən, 2025-ci ildə Mercedes-Benz-in tam elektrikli avtomobil satışları əvvəlki illə müqayisədə 9 faiz azalaraq 168 min 800 ədəd təşkil edib. Eyni dövrdə BMW-nin elektrikli avtomobil satışları isə 3,6 faiz artaraq 442 min 72 ədədə yüksəlib.
Mercedes-in baş icraçı direktoru Ola Kallenius şirkətin elektrikli avtomobil bazarında rəqiblərlə eyni tempdə irəliləməyə çalışdığını bildirib. Qarşıdakı dövrdə Çin avtomobil istehsalçılarının sürətli böyüməsi, Asiya və Avropada istehlakçı etimadının qeyri-sabit qalması fonunda Mercedes-in daha yüksək seqmentdə mövqelənmə strategiyası ciddi sınaqla üzləşəcək.
2025-ci il şirkət üçün bəzi müsbət nəticələrlə də yadda qalıb. Belə ki, G-Seriyası yolsuzluq avtomobilləri rekord satış göstəricilərinə nail olub. Bununla yanaşı, Mercedes ABŞ-ın tətbiq etdiyi gömrük rüsumları və lüks seqmentə daxil olan Çin istehsalçılarının artan rəqabəti ilə mübarizə aparır.
Hesabat ilində Mercedes-in ümumi avtomobil satışı da 9 faiz azalaraq 1,8 milyon ədədə enib. Şirkət ardıcıl olaraq zəif nəticə göstərdiyi daha bir ili geridə qoyub. Yerli avtomobil markaları ilə rəqabətin güclənməsi fonunda Çinə tədarüklər 19 faiz azalıb. E-Class kimi orta ölçülü modellərin də daxil olduğu əsas seqmentlərdə qlobal satışlar 10 faiz azalaraq 1 milyon 50 min ədəd olub.
Bununla belə, Mercedes-in elektrikli avtomobil portfelində canlanma əlamətləri müşahidə olunur. Şirkətin yeni CLA elektrikli sedanı Brüssel Beynəlxalq Avtomobil Sərgisində Avropada “İlin avtomobili” seçilib. Həmçinin CLA modeli və bazara yeni çıxacaq GLC EV üçün sifarişlərin 2026-cı ilin ikinci yarısına qədər dolu olduğu bildirilir.
Monetar.az
