Reuters-in sorğusuna əsasən, dekabr ayında OPEC-in neft hasilatı İran və Venesueladan tədarükün azalması səbəbindən düşüb. Bu isə həmin ay üçün OPEC+ sazişi çərçivəsində nəzərdə tutulan hasilat artımının təsirini neytrallaşdırıb.
Ötən ay OPEC ölkələri sutkada 28,40 milyon barel neft hasil edib ki, bu da noyabr ayının yenidən nəzərdən keçirilmiş göstəricisindən 100 min barel/sutka azdır. Ən böyük azalma İranın payına düşüb.
Təklifin artıq olması ilə bağlı narahatlıqlar fonunda OPEC+ alyansı aylıq hasilat artımının tempini zəiflədib. Qrupun bir çox ixracatçıları artıq istehsal güclərinin həddində çalışır, bəzilərinə isə əvvəlki dövrlərdə yol verilmiş artıq istehsalın kompensasiyası üçün əlavə ixtisarlar tətbiq olunur ki, bu da kvotaların artırılmasının təsirini məhdudlaşdırır.
Dekabr üçün OPEC+ sazişi çərçivəsində səkkiz iştirakçı ölkədən beşi — Əlcəzair, İraq, Küveyt, Səudiyyə Ərəbistanı və BƏƏ hasilatı 85 min barel/sutka artırmalı idi (İraq və BƏƏ üçün ümumilikdə 135 min barel/sutka həcmində kompensasiya ixtisarlarının təsiri nəzərə alınmadan).
Lakin sorğu göstərir ki, bu beş ölkədə faktiki hasilat artımı cəmi 20 min barel/sutka olub.
Sorğuya görə, dekabr ayında İran neftinin tədarükü 100 min barel/sutka azalıb. İran Tehranın nüvə fəaliyyəti ilə əlaqədar neft ixracını məhdudlaşdırmağa yönəlmiş ABŞ sanksiyaları altındadır; son tədbirlər dekabrda elan edilib.
Venesuela neftinin tədarükü isə ABŞ tərəfindən tətbiq edilən və neft daşımalarının azaldılmasına yönəlmiş blokada fonunda dekabrda 70 min barel/sutka azalıb. Gözlənilir ki, bu məhdudiyyətlərin təsiri cari ayda daha da güclənəcək.
Energy Aspects konsaltinq şirkəti dekabr ayının böyük hissəsində Venesuelada hasilatda ciddi dəyişiklik qeydə almasa da, şirkət bildirir ki, bu ay neft və kondensat istehsalı dekabrda olan 1,1 milyon barel/sutkadan 950 min barel/sutkaya enəcək.
MONETAR.AZ
