Azərbaycan Dövlət Neft Şirkəti (SOCAR) və Britaniyanın BP şirkəti Xəzər hövzəsində seysmik və quyu tədqiqatları sahəsində əməkdaşlıq haqqında saziş imzalayıb. Bu barədə SOCAR-ın mətbuat xidməti məlumat yayıb.
Razılaşmaya əsasən, tərəflər əvvəlcədən toplanmış məlumatların inteqrasiyası və vahidləşdirilməsi yolu ilə regional psevdо-3D seysmik kubun yaradılması üçün innovativ texnologiyaların tətbiqi ilə qabaqcıl seysmik tədqiqat həyata keçirəcəklər. Qeyd olunur ki, bu, Xəzər dənizinin Azərbaycan sektorunda bu tip ilk layihə olacaq.
Formalaşdırılacaq psevdо-3D seysmik həcm ayrı-ayrı 2D seysmik profillərdən asılılığın azalması hesabına regional geoloji interpretasiyanın keyfiyyətini əhəmiyyətli dərəcədə artıracaq.
Bu yanaşma hövzə miqyasında 3D xəritələşdirmə aparmağa, neft-qaz perspektivlərinin daha dərindən anlaşılmasına və Xəzər hövzəsində gələcək layihələrin icrası zamanı geoloji-kəşfiyyat risklərinin azaldılmasına imkan verəcək.
Əməkdaşlıq çərçivəsində SOCAR BP-yə 2D seysmik profillər, quyu məlumatları və geoloji nümunələr təqdim edəcək. BP isə seysmik materialların emalını və nümunələr üzrə laboratoriya analizlərinin aparılmasını təmin edəcək. Psevdо-3D seysmik massiv müasir texniki imkanlara və bu texnologiyanın tətbiqində təsdiqlənmiş təcrübəyə malik podratçı şirkət tərəfindən formalaşdırılacaq.
