Azərbaycan Respublikası Prezidentinin sosial-iqtisadi məsələlər üzrə köməkçisi Xalid Əhədov, İsmayıllıda keçirilən Dağlıq Şirvan iqtisadi rayonu üzrə regional müşavirədə çıxışı zamanı aqrar sektorda yeni strateji mərhələnin başladığını elan edib. AZƏRTAC-a istinadən verilən məlumata görə, Prezident İlham Əliyevin son illərdə kənd təsərrüfatında müşahidə olunan durğunluq və mövcud dinamika ilə bağlı tənqidi fikirlərindən sonra rəsmi qurumlara verdiyi tapşırıqlar əsasında yeni proqram hazırlanıb.
"Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı" ölkənin aqrar sahədəki gələcək yol xəritəsini müəyyən edir.
Kənd təsərrüfatı məhsulları istehsalçılarına birbaşa subsidiyaların verilməsi ərzaq təhlükəsizliyinin təmin olunmasında əsas dövlət dəstəyi mexanizmidir. Burada əsas məqsəd sadəcə istehsal həcmini vizual olaraq artırmaq deyil, səmərəliliyi və innovativ texnologiyaların tətbiqini təşviq etmək, fermerlərin müasir aqrar xidmətlərə çıxışını asanlaşdırmaqdır.
