Rusiyada 2027-ci ildən etibarən sığorta pensiyalarının indeksləşdirilməsi mexanizminin dəyişdirilməsi planlaşdırılır. Yeni qaydalara əsasən, pensiya ödənişləri ildə iki dəfə artırılacaq.
Məlumata görə, indeksləşdirmənin ilk mərhələsi fevral ayında həyata keçiriləcək və əvvəlki ilin faktiki inflyasiya göstəriciləri nəzərə alınacaq. İkinci artım isə aprel ayında Sosial Fondun gəlirləri və maliyyə imkanları əsasında müəyyən ediləcək.
Ekspertlərin fikrincə, yeni yanaşma əvvəlcədən müəyyən edilən proqnozlardan deyil, real iqtisadi göstəricilərdən asılı olacaq. Bu, pensiyaların qiymət artımına daha çevik uyğunlaşdırılmasına imkan verə bilər.
Proqnozlara görə, 2027-ci ildə pensiyaların fevral ayında təxminən 4 faiz, aprel ayında isə əlavə olaraq 3 faizdən çox artırılması gözlənilir. Bununla belə, yekun göstəricilər iqtisadi vəziyyət və büdcə imkanlarından asılı olacaq.
Mütəxəssislər bildirirlər ki, yeni mexanizmin əsas məqsədi pensiya gəlirlərinin inflyasiya və digər makroiqtisadi dəyişikliklərə uyğunlaşdırılmasıdır.
MONETAR.AZ
