Beynəlxalq Enerji Agentliyi bugün bəyan edib ki, təşkilata üzv olan 32 ölkə strateji ehtiyatlardan 400 milyon barel neftin bazara buraxılması barədə yekdilliklə razılığa gəlib. Bu addım təşkilatın tarixində ən böyük həcmdə ehtiyatın istifadəyə verilməsi hesab olunur və belə tədbirin tətbiq olunduğu cəmi beşinci haldır.
Agentliyin icraçı direktoru Fatih Birol açıqlamasında bildirib ki, qərar Yaxın Şərqdə baş verən hadisələr və Hörmüz boğazının bağlanması nəticəsində yaranan bazar pozuntularını aradan qaldırmaq məqsədi daşıyır. Agentliyin məlumatına görə, ehtiyatların bazara buraxılması hər bir üzv ölkənin milli şəraitinə uyğun vaxt qrafiki ilə həyata keçiriləcək.
Birol həmçinin qeyd edib ki, xüsusilə aviasiya yanacağı və dizel yanacağı tədarükü üçün ciddi nəticələr yaranıb. O, eyni zamanda təbii qaz bazarlarında vəziyyətin çox mürəkkəb olduğunu vurğulayıb. Onun sözlərinə görə, hazırkı qərar bazara dərhal dəstək vermək məqsədi daşıyır və eyni zamanda Hörmüz boğazı vasitəsilə nəqliyyatın bərpasına çağırış edir.
Agentliyin katibliyi bildirib ki, bu kollektiv tədbirlərin necə həyata keçiriləcəyi ilə bağlı əlavə məlumatlar uyğun vaxtda təqdim olunacaq. Təşkilat əlavə edib ki, qlobal neft və qaz bazarlarının vəziyyətini diqqətlə izləməyə davam edəcək.
Hazırda Beynəlxalq Enerji Agentliyinə üzv ölkələrin dövlət ehtiyatlarında ümumilikdə 1,2 milyard barel neft mövcuddur. Bundan əlavə, məcburi kommersiya ehtiyatlarında daha 600 milyon barel neft saxlanılır.
MONETAR.AZ
