2015-ci ildən bəri dünyanın aparıcı iqtisadiyyatlarında təmiz elektrik enerjisinin payı ümumilikdə artıb. Təhlil nüvə, hidro, külək, günəş və digər bərpa olunan mənbələrdən istehsal olunan elektrik enerjisini əhatə edir. Məlumatlar göstərir ki, artım sürəti ölkələr arasında ciddi fərqlər yaradır.
Avropada təmiz enerji keçidi daha sürətli gedir və xüsusilə Birləşmiş Krallıq bu sahədə liderdir. Ölkə 2015-ci ildən bəri təmiz elektrik payını 19,5 faiz bəndi artırıb. Almaniya və İtaliya da əhəmiyyətli artım nümayiş etdirərək kömürdən bərpa olunan enerji mənbələrinə keçidi sürətləndirib.
Fransa isə artıq 90 faizdən çox təmiz enerji payı ilə dünya liderlərindən biri olaraq qalır. Bu göstərici əsasən ölkənin uzun illərdir istifadə etdiyi nüvə enerjisi ilə bağlıdır.
Asiya ölkələrində isə vəziyyət daha qarışıqdır. Çin və Hindistan təmiz enerji payını artırsa da, sürətli enerji tələbi səbəbindən kömürdən asılılıq tam azalmayıb. Yaponiya isə Fukusima qəzasından sonra nüvə stansiyalarının tədricən bərpası və bərpa olunan enerji layihələri hesabına ciddi artım əldə edib.
ABŞ-da da külək və günəş enerjisinin inkişafı təmiz enerji payını artırıb, lakin təbii qazdan asılılıq bu artımın tempini zəiflədib. Rusiya isə son illərdə demək olar ki, ciddi dəyişiklik göstərməyib və enerji strukturu sabit qalıb.
Ümumilikdə, ekspertlər bildirirlər ki, qlobal enerji keçidi sürətlənir, lakin ölkələr arasında fərqlər hələ də çox böyükdür. Bəzi ölkələr sürətlə yaşıl enerjiyə keçid etdiyi halda, digərləri daha yavaş irəliləyir.
MONETAR.AZ
