Uzun illərdir xarici investisiya qıtlığı çəkən Venesuela rəsmən ən böyük enerji müqavilələrindən birinə imza atıb. Reuters agentliyinin yaydığı məlumata görə, qlobal enerji nəhəngi "Shell" ilə Venesuela hökuməti arasında təbii qaz yataqlarının işlənməsi və neft hasilatının artırılmasını nəzərdə tutan beş yeni saziş imzalanıb. Venesuela prezidentinin xüsusi nümayəndəsi Delsi Rodriqes dövlət televiziyasında etdiyi çıxışda bu addımın ölkənin ixrac imkanlarını genişləndirəcəyini və iqtisadi dirçəlişə təkan verəcəyini qeyd edib.
Yatağın istismarının birinci fazası başlayır. Hədəf həm yerli sənayeni mavi qazla təmin etmək, həm də ixrac marşrutları vasitəsilə ölkəyə valyuta axını yaratmaqdır. Ağır neft ehtiyatları ilə tanınan ölkədə "Shell"in dəstəyi ilə daha dəyərli və emalı asan olan yüngül neft hasilatının artırılması hədəflənir.
Sanksiyalar səbəbindən çökmüş neft-qaz infrastrukturuna qlobal maliyyə və texnoloji dəstək qayıdır. Hasilat limitlərinin yüksəldilməsi Karakasın dünya enerji bazarında yenidən əsas oyunçulardan birinə çevrilməsinə şərait yaradır.
"Shell" kimi nəhəng bir korporasiyanın Venesuela ilə uzunmüddətli sazişlərə imza atması, qlobal enerji bazarında xammal qıtlığının yaratdığı geosiyasi zərurətdən xəbər verir. Karakas üçün bu müqavilələr təkcə iqtisadi deyil, həm də illərdir davam edən beynəlxalq izolyasiyadan tamamilə qurtulmaq üçün mühüm bir xilas kəməridir.
MONETAR.AZ
