ABŞ Federal Ehtiyat Sistemi (FED) yeni sədr Kevin Uorşun rəhbərliyi ilə ilk iclasını başa çatdırmağa hazırlaşır. Bazar iştirakçıları əsas faiz dərəcəsində dəyişiklik gözləməsələr də, FED-in gələcək pul-kredit siyasəti ilə bağlı açıqlamaları diqqət mərkəzində olacaq.
Məlumata görə, faiz dərəcəsinin hazırkı 3,5-3,75 faiz intervalında saxlanılacağı ehtimal olunur. Qərar ABŞ-da inflyasiyanın yüksəlməsi, əmək bazarının sabit qalması və ABŞ-İran münasibətlərində mümkün razılaşma fonunda veriləcək.
Analitiklərin fikrincə, ABŞ-da inflyasiya göstəriciləri son aylarda yenidən artıb və bu, FED-in qiymət artımlarına qarşı daha ehtiyatlı mövqe saxlamasına səbəb ola bilər. Bununla yanaşı, əmək bazarında ciddi zəifləmə müşahidə olunmur, işsizlik səviyyəsi aşağı olaraq qalır.
Ekspertlər qeyd edirlər ki, ABŞ ilə İran arasında mümkün razılaşma və neft qiymətlərinin aşağı düşməsi inflyasiya təzyiqini azalda bilər. Lakin bu təsirin iqtisadi göstəricilərdə tam əks olunması müəyyən vaxt tələb edəcək.
Bazar iştirakçıları hesab edirlər ki, FED bu mərhələdə faizləri dəyişmədən saxlaya bilər. Bununla belə, qurumun rəhbərliyinin inflyasiya ilə mübarizə məsələsində daha sərt mövqe nümayiş etdirə biləcəyi bildirilir.
Kevin Uorşun ilk iclası yeni rəhbərliyin iqtisadi vəziyyətə yanaşmasını göstərən mühüm addım kimi qiymətləndirilir. FED-in qərarlarının ABŞ dolları, fond bazarları və qlobal maliyyə aktivlərinə təsir göstərə biləcəyi gözlənilir.
MONETAR.AZ
