BP 2026-cı ilin birinci rübü üzrə əvəzetmə dəyərinə əsaslanan əsas mənfəətinin (RC) 3,2 milyard dollar olduğunu açıqlayıb. Bu göstərici analitiklərin 2,67 milyard dollarlıq proqnozunu üstələyir və həm əvvəlki rübdəki (1,5 milyard dollar), həm də ötən ilin eyni dövründəki (1,38 milyard dollar) nəticədən xeyli yüksəkdir.
Şirkət artımı əsasən neft ticarətindən əldə olunan yüksək gəlir və Midstream seqmentində güclü nəticələrlə izah edir. Neft nəhənginin xalis (statut) mənfəəti isə 3,8 milyard dollar olub. Bu, əvvəlki rübdə qeydə alınmış 3,4 milyard dollarlıq zərərin əksinə olaraq müsbət nəticədir.
Upstream seqmentində gündəlik hasilat 2,33 milyon barel neft ekvivalenti təşkil edib, istehsal obyektlərinin etibarlılığı isə 95,7% səviyyəsində olub.
Əməliyyat pul axını 2,9 milyard dollar təşkil edib (dövriyyə kapitalının 6 milyard dollar artımından sonra). Kapital xərcləri 3,3 milyard dollara düşüb (ötən il 3,6 milyard dollar idi). Xalis borc isə 2024-cü ilin sonundakı 22,2 milyard dollardan 25,3 milyard dollara yüksəlib.
Şirkət adi səhmlər üzrə rüblük dividendləri dəyişməyərək 8,32 sent səviyyəsində saxlayıb.
Şirkətin baş icraçı direktoru Meq O’Nil bildirib ki, bu rüb həm əməliyyat, həm də maliyyə baxımından güclü nəticələrlə yadda qalıb və 2027-ci il hədəflərinə doğru irəliləyiş davam edir. Onun sözlərinə görə, Meksika körfəzi və ABŞ-dakı quru layihələrdə hasilat artıb və ümumi istehsal sabit saxlanılıb.
Şirkət ikinci rübdə Upstream seqmentində hasilatın azalacağını gözləyir. Bu, əsasən Meksika körfəzində planlı texniki xidmət işləri və Yaxın Şərqdə davam edən fasilələrlə əlaqələndirilir.
BP illik kapital xərcləri üzrə 13–13,5 milyard dollar büdcəsini təsdiqləyib və aktiv satışlarından 9–10 milyard dollar gəlir gözlədiyini bildirib. Bu gəlirin əsas hissəsinin ilin ikinci yarısında, o cümlədən Castrol biznesinin planlaşdırılan satışından daxil olacağı qeyd olunub.
