Kəpəz BOKT MMC 2025-ci il üzrə maliyyə hesabatını açıqlayıb. Təhlil göstərir ki, şirkət artım tempini qorusa da, maliyyə dayanıqlılığı baxımından bir sıra mühüm risklər qalmaqdadır.
Hesabat dövründə aktivlərin həcmi 14,8 mln manata çataraq illik müqayisədə 22,1% artıb. Bu artımın əsas mənbəyi kredit portfelinin genişlənməsi olub. Müştərilərə verilmiş kreditlər 12,24 mln manata yüksələrək 14,7% artıb. Nəticədə aktiv strukturunda kreditlərin yüksək payı formalaşıb. Bu, gəlirlilik üçün müsbət amil sayılsa da, portfeldə kredit riskinin konsentrasiyasını artırır və riskə uyğun gəlirliliyə təzyiq yaradır.
BOKT 2,65 mln manat vergidən əvvəl mənfəət əldə edib. Xalis mənfəət isə 2,12–2,43 mln manat intervalında dəyişir. Faiz gəlirləri 14,9 % artsa da, gözlənilən kredit zərərləri üzrə ehtiyatların 87 % yüksəlməsi aktiv keyfiyyətində potensial pisləşmə siqnalı kimi qiymətləndirilir.
Ən diqqət çəkən məqamlardan biri əməliyyat fəaliyyətindən yaranan pul axınlarıdır. Şirkət mənfəət göstərsə də, əməliyyat fəaliyyəti üzrə xalis pul axını mənfi 0,97 mln manat olub. Bu, mənfəətin nağd vəsaitə çevrilmə səviyyəsinin aşağı olduğunu və “gəlirin keyfiyyəti” (quality of earnings) baxımından risklərin mövcudluğunu göstərir.
Maliyyə strukturuna baxdıqda, öhdəliklərin 7,35 mln manat səviyyəsində olduğu görünür. Onların əhəmiyyətli hissəsi buraxılmış borc qiymətli kağızları hesabına formalaşıb. Bu isə şirkətin maliyyələşmədə bazar borc alətlərindən yüksək asılı olduğunu və faiz dərəcəsi riskinə məruz qaldığını göstərir. Eyni zamanda faiz xərclərinin artması xalis faiz marjasına təzyiq yaradır.
Likvidlik göstəriciləri nominal olaraq stabil görünsə də, nağd vəsaitlərin həcmi 1,01 mln manatdır və bu, kredit portfeli ilə müqayisədə məhduddur. Bu vəziyyət potensial likvidlik stress ssenarilərində qoruyucu buferin zəif ola biləcəyini göstərir.
Kapital mövqeyi 7,43 mln manata çataraq 39,9% artıb ki, bu müsbət haldır. Lakin artımın əsasən daxili mənfəət hesabına təmin olunması kapitalın diversifikasiya mənbələrinin məhdud olduğunu göstərir.
MONETAR.AZ
