2026-cı ilin yanvar–mart ayları üzrə Azərbaycanda fəaliyyət göstərən sığorta şirkətlərinin həyata keçirdiyi ödənişlərin həcminə dair renkinq açıqlanıb. Məlumatlara əsasən, ilk rübdə sektor üzrə ümumi sığorta ödənişləri 218,456 milyon manat təşkil edib ki, bu da illik müqayisədə 33,2% artım deməkdir.
Siyahıda liderliyi “Paşa Həyat Sığorta” qoruyub saxlayıb. Şirkət hesabat dövründə 127,104 milyon manat ödəniş həyata keçirərək ötən ilin eyni dövrü ilə müqayisədə 29,6% artım nümayiş etdirib. İkinci yerdə “Paşa Sığorta” (34,357 mln. manat, +24,1%), üçüncü yerdə isə “Atəşgah Həyat Sığorta” (21,667 mln. manat, +164,2%) qərarlaşıb.
Növbəti pillələrdə “Atəşgah Sığorta” (9,689 mln. manat, +15,4%), “Qala Sığorta” (5,919 mln. manat, +14,5%) və “Azərbaycan Sənaye Sığorta” (4,142 mln. manat, +48,8%) yer alır. Siyahının davamında “Meqa Sığorta” (3,942 mln. manat, +15,0%), “A-Group Sığorta” (3,104 mln. manat, +28,3%), “Xalq Sığorta” (2,399 mln. manat, +32,7%) və “AtaSığorta” (1,915 mln. manat, +78,4%) göstərilib.
Eyni zamanda bəzi şirkətlərdə azalma müşahidə olunub. “Xalq Həyat Sığorta”nın ödənişləri 1,894 milyon manat olmaqla 18% azalıb. “AzSığorta”da azalma 14%, “Aqrar Sığorta”da isə 79,9% təşkil edib. “Silkway Sığorta” isə demək olar ki, ödəniş həyata keçirməyib (0 manat, -96,1%).
Diqqət çəkən məqamlardan biri “Qala Həyat Sığorta”nın kəskin artımıdır – şirkət ödənişlərini 396,3% artıraraq 0,955 milyon manata çatdırıb. “Meqa Həyat Sığorta” isə 0,744 milyon manat ödənişlə 5,4% artım nümayiş etdirib.
Ümumilikdə, ilk rübün nəticələri sığorta sektorunda ödənişlərin artdığını göstərsə də, bazarda konsentrasiya yüksək olaraq qalır və əsas pay bir neçə böyük şirkətin əlində cəmləşir. Eyni zamanda bəzi iştirakçıların zəifləməsi sektor daxilində balansın qeyri-bərabər olduğunu göstərir.
MONETAR.AZ
