2026-cı ilin yanvar–mart ayları üzrə Azərbaycanda fəaliyyət göstərən sığorta şirkətlərinin topladığı sığorta haqlarının həcmi açıqlanıb. Hesabat dövründə sektor üzrə ümumi yığımlar 417,753 milyon manat təşkil edib ki, bu da illik müqayisədə cəmi 4,7% artım deməkdir. Bu göstərici ötən dövrlərlə müqayisədə artım tempinin zəiflədiyini göstərir.
Renkinqə yenə də “Paşa Həyat Sığorta” liderlik edir. Şirkət 181,640 milyon manat sığorta haqqı toplayaraq illik müqayisədə 12,2% artım nümayiş etdirib. İkinci yerdə “Paşa Sığorta” (122,315 mln. manat, +6,5%), üçüncü yerdə isə “Atəşgah Həyat Sığorta” (29,617 mln. manat, +7,2%) qərarlaşıb. Bu üçlük bazarın əsas hissəsini formalaşdırmağa davam edir.
Hesabat dövründə bir sıra sığorta şirkətləri müsbət dinamika nümayiş etdirib. “Aqrar Sığorta” 28,4% artımla 11,319 milyon manata çatıb. “Meqa Həyat Sığorta” isə 77,2% artım nümayiş etdirərək 6,613 milyon manatlıq nəticə ilə diqqət çəkir.
Bununla yanaşı, “Qala Həyat Sığorta” (6,626 mln. manat, +1,4%), “Xalq Həyat Sığorta” (2,972 mln. manat, +16,6%), “AzSığorta” (1,927 mln. manat, +0,9%) və “Silkway Sığorta” (0,549 mln. manat, +13,9%) da artım qeydə alan şirkətlər sırasındadır. “Azərbaycan Sənaye Sığorta” (9,124 mln. manat, +5,6%) da müsbət dinamikanı qoruyub.
Bazarda azalma yaşayan şirkətlərin sayı da az deyil. Ən kəskin geriləmə “AtaSığorta”da qeydə alınıb – şirkətin yığımları demək olar ki, tam dayanaraq 0,002 milyon manata düşüb (-99,9%).
“Qala Sığorta” da ciddi azalma ilə üzləşib (-47,0%, 13,355 mln. manat). “Atəşgah Sığorta” (-10,8%, 13,251 mln. manat), “Xalq Sığorta” (-4,8%, 7,282 mln. manat), “Meqa Sığorta” (-4,6%, 7,182 mln. manat) və “A-Group Sığorta” (-9,3%, 3,979 mln. manat) da mənfi dinamika göstərib.
Rəqəmlər göstərir ki, sığorta bazarında ümumi artım davam etsə də, bu artım əsasən iri oyunçular hesabına formalaşır. Kiçik və orta şirkətlər arasında isə həm sürətli artım, həm də kəskin geriləmə halları müşahidə olunur. Bu isə bazarda qeyri-bərabər inkişafın davam etdiyini və rəqabət mühitinin tam balanslaşmadığını göstərir.
MONETAR.AZ
