Xiaomi özünün müstəqil şəkildə hazırladığı insanabənzər robotları elektromobil istehsalı zavodunda sınaqdan keçirib. Bu barədə şirkətin prezidenti Lu Veybin məlumat verib.
Lu CNBC-yə İspaniyanın Barselona şəhərində keçirilən Mobile World Congress sərgisi zamanı verdiyi müsahibədə bildirib ki, iki insanabənzər robot üç saat ərzində işin təxminən 90%-ni yerinə yetirə bilir. Robotlar bolt və qaykaların quraşdırılması, eləcə də materialların daşınması kimi tapşırıqları icra edə bilir.
Lu qeyd edib ki, robotların istehsal xətlərinə inteqrasiyası zamanı ən böyük çətinlik tələb olunan iş tempinin qorunmasıdır. Xiaomi-nin avtomobil zavodunda hər 76 saniyədə bir yeni avtomobil konveyerdən çıxır və iki insanabənzər robot bu sürəti saxlamağa qadirdir.
Şirkət prezidenti vurğulayıb ki, zavodlarda insanabənzər robotlardan istifadə və məhsuldarlığın artırılması Xiaomi üçün əsas istiqamətlərdən biridir. Onun sözlərinə görə, gələcəkdə bu cür robotlar müəyyən işlərdə insanları əvəz edə və insanların görə bilmədiyi tapşırıqları yerinə yetirə biləcəklər.
Xiaomi ilk dəfə öz insanabənzər robotu CyberOne-ı 2022-ci ildə təqdim edib, lakin hazırda bu məhsul satışda deyil.
Lu əlavə edib ki, istehsal müəssisələrində robotlardan istifadə hələ erkən mərhələdədir. Onun sözlərinə görə, hazırda robotlar istehsal xətlərində rəsmi işçi kimi deyil, daha çox təcrübəçi kimi fəaliyyət göstərirlər.
MONETAR.AZ
