Qlobal bazarlarda qızılın qiyməti çərşənbə günü təxminən 2% azalaraq bir unsiya üçün 4 400 dollar səviyyəsinə düşüb. Bu, son iki ayda qeydə alınan ən aşağı göstərici hesab olunur.
Qiymətlərin geriləməsinə əsas səbəb neftin ucuzlaşması fonunda inflyasiya təzyiqlərinin azalacağına dair gözləntilərin güclənməsi olub. İnvestorlar Yaxın Şərqdə vəziyyəti diqqətlə izləməyə davam edirlər.
Bazarlarda ABŞ və İran arasında mümkün razılaşmanın əldə olunacağına dair optimizm artıb. Treyderlər hesab edir ki, tərəflər münaqişənin dayandırılması və Hörmüz boğazında gəmi hərəkətinin bərpası ilə bağlı yaxın zamanda razılığa gələ bilər.
Optimist gözləntilər Vaşinqton və Tehran tərəfindən verilən ziddiyyətli açıqlamalara, eləcə də həftənin əvvəlində baş verən yeni hücumlara baxmayaraq davam edir. İran dövlət televiziyası Tehran və Vaşinqton arasında qeyri-rəsmi memorandum layihəsinin detallarını yayımlayıb. Bildirilib ki, sənəd Hörmüz boğazında nəqliyyat axınının bərpasını nəzərdə tutur. Lakin Ağ Ev bu məlumatı təkzib edib.
Analitiklər qeyd edirlər ki, enerji qiymətlərinin yaratdığı inflyasiya risklərinin azalması aparıcı mərkəzi bankların sərt pul siyasətini daha uzun müddət davam etdirə biləcəyi ehtimalını artırır. Bu isə təhlükəsiz aktiv hesab olunan qızıla olan tələbi zəiflədib.
Hazırda qızılın qiyməti Yaxın Şərqdə gərginliyin başladığı dövrdəki səviyyədən təxminən 15% aşağıdır.
