Avropa Mərkəzi Bankı (AMB) prezidenti Kristin Laqard inflyasiya ilə bağlı risklərin artdığını, iqtisadi artım üzrə risklərin isə aşağı yönlü olduğunu açıqlayıb.
Frankfurtda keçirilən mətbuat konfransında çıxış edən AMB rəhbəri bildirib ki, xüsusilə enerji bazarlarında baş verən proseslər qiymətlərə təzyiq göstərir. Onun sözlərinə görə, Orta Şərqdə davam edən münaqişə enerji qiymətlərində kəskin artıma səbəb olaraq inflyasiyanı yüksəldir və iqtisadi inamı zəiflədir.
Laqard vurğulayıb ki, müharibənin inflyasiya və iqtisadi fəaliyyətə təsiri onun müddəti və enerji qiymətlərinin nə qədər yüksək qalacağından asılı olacaq: “Münaqişə nə qədər uzun davam edərsə, təsirlər bir o qədər güclü olacaq”.
AMB rəhbəri qeyd edib ki, qısamüddətli inflyasiya gözləntilərində artım müşahidə olunsa da, qurum vəziyyəti yaxından izləməkdə davam edir. O əlavə edib ki, faiz qərarları inflyasiya proqnozları, iqtisadi göstəricilər və pul siyasətinin effektivliyinə əsaslanaraq qəbul ediləcək və əvvəlcədən müəyyən edilmiş faiz trayektoriyası mövcud deyil.
Eyni zamanda, Laqard bildirib ki, Avrozonada iqtisadi perspektiv qeyri-müəyyən olaraq qalır. Son məlumatlar iqtisadi aktivliyin zəiflədiyini, həm istehlakçıların, həm də biznesin inamında azalma olduğunu göstərir.
AMB-nin son qərarına əsasən, əsas faiz dərəcələri dəyişdirilməyib: depozit faizi 2 faiz, əsas yenidən maliyyələşdirmə faizi 2,15 faiz, marjinal kredit faizi isə 2,40 faiz səviyyəsində saxlanılıb.
Son statistikaya görə, Avrozonada illik inflyasiya apreldə 3 faizə yüksələrək AMB-nin 2 faizlik hədəfindən yuxarı qalmaqda davam edir. Enerji bazarlarında baş verən artımlar, xüsusilə neft və qaz qiymətlərinin yüksəlməsi bu prosesə əsas təsir edən amillər kimi qiymətləndirilir.
MONETAR.AZ
