Consumer Insights sorğusunun nəticələrinə görə sağlamlıq və fitnes xidmətlərindən istifadə səviyyəsi ölkələr arasında ciddi şəkildə dəyişir. Sorğu 18–64 yaş arası respondentlər arasında 2024-cü ilin oktyabrından 2025-ci ilin sentyabrınadək aparılıb.
Məlumata əsasən, Hindistanda sorğuda iştirak edənlərin 46 faizi son bir il ərzində idman zalı üzvlüyü, fitnes tətbiqləri və ya oxşar xidmətlərdən istifadə etdiyini bildirib. Braziliyada bu göstərici 44 faiz, Finlandiyada isə 38 faiz olub. Çində respondentlərin 34 faizi sağlamlıq və fitnes xidmətlərindən yararlandığını deyib.
Avropa ölkələrində göstəricilər nisbətən aşağıdır. Almaniyada bu pay 27 faiz, Fransada isə 24 faiz təşkil edib. ABŞ-da da respondentlərin təxminən dörddə biri – 24 faizi son 12 ayda bu cür xidmətlərdən istifadə etdiyini qeyd edib. Ən aşağı göstərici isə Yaponiyada qeydə alınıb – cəmi 9 faiz.
Mütəxəssislərin fikrincə, yeni il ərəfəsində sağlam həyat tərzi ilə bağlı məqsədlərin artmasına baxmayaraq, ölkələrin mədəni xüsusiyyətləri və həyat tərzi sağlamlıq və fitnes xidmətlərinə marağa birbaşa təsir göstərir.
