Ümumdünya Səhiyyə Təşkilatının (ÜST) məlumatına əsasən, 2000–2024-cü illər arasında dünyada vərəm əleyhinə peyvəndlənmə göstəriciləri əksər regionlarda artıb və qlobal səviyyədə 88 faizə çatıb. Bu barədə məlumat 27–28 aprel tarixlərində İsveçrənin Cenevrə şəhərində keçirilən “Qlobal Vərəm Peyvəndi Forumunda” təqdim olunub. Forumda səhiyyə rəhbərləri, donorlar və vaksin istehsalçıları vərəmlə mübarizədə irəliləyişləri müzakirə ediblər.
ÜST-nin məlumatına görə, Afrika, Şərqi Aralıq dənizi, Cənub-Şərqi Asiya və Qərbi Sakit okean regionlarında peyvəndlənmə səviyyəsində artım qeydə alınıb. Bu artım əsasən səhiyyə sistemlərinin gücləndirilməsi və rutin immunizasiya proqramlarının genişləndirilməsi ilə izah olunur.
Avropada vəziyyət sabit qalıb və 2024-cü ildə doğulan körpələrin 94 faizi BCG peyvəndi alıb. Amerika qitəsində isə əks tendensiya müşahidə olunub və peyvəndlənmə səviyyəsi 2000-ci ildəki 96 faizdən 2024-cü ildə 87 faizə düşüb.
Eyni zamanda ÜST bildirir ki, 2024-cü ildə dünyada təxminən 10,7 milyon insan vərəmlə xəstələnib. Bu, hər 100 min nəfərə 131 yeni yoluxma halı deməkdir.
Regionlar üzrə ən yüksək yoluxma halları Cənub-Şərqi Asiyada (34 faiz), Qərbi Sakit okean regionunda (27 faiz) və Afrikada (25 faiz) qeydə alınıb. Daha az pay isə Şərqi Aralıq dənizi (8,6 faiz), Amerika (3,3 faiz) və Avropa (1,9 faiz) regionlarına düşüb.
ÜST vurğulayır ki, vərəmlə mübarizədə peyvəndlənmə mühüm rol oynasa da, xəstəliyin yayılmasının qarşısının alınması üçün səhiyyə sistemlərinin daha da gücləndirilməsi vacibdir.
MONETAR.AZ
