Keçmiş sovet respublikası qiymət artımına
Qızıl Azərbaycanda da kəskin bahalaşıb
6 Oktyabr 2025
12:08
Mərkəzi Bankın son açıqlamasına görə, oktyabrın əvvəlində Azərbaycanda qızılın 1 qramının rəsmi qiyməti 216 manata çataraq yeni bir rekorda imza atıb. Bu təkcə bir günlük statistik göstərici deyil – qiymətlərdəki artım tendensiyası həm qısamüddətli, həm də illik müqayisədə özünü aydın şəkildə göstərir.
Qızılın 1 qramı bu gün 2,5% və ya 5,2 manat bahalaşıb. Bu isə qiymətlərin son günlərdə nə qədər sürətlə yüksəldiyini ortaya qoyur.
Aylıq müqayisədə isə artım daha da diqqətçəkicidir: son bir ayda qızılın qiyməti 10,8% və ya 21 manat bahalaşıb. Bu ilin əvvəlindən bəri isə qızıl 49,5% və ya 71,5 manat bahalaşıb. Beləliklə, 2025-ci ilin əvvəlində 1 qramı təxminən 145 manat olan qızıl, artıq 216 manata satılır.
Tarixi müqayisə apardıqda vəziyyət daha da aydın görünür. 2010-cu ilin əvvəlində Azərbaycanda qızılın bir qramı cəmi 29 manat idi. Bu isə o deməkdir ki, son 15-16 il ərzində qızılın qiyməti 7,5 dəfəyə yaxın artıb. Bu gün müşahidə olunan qiymət artımı ölkə tarixində müşahidə olunan ən yüksək səviyyədir.
Qızılın yalnız Mərkəzi Bank tərəfindən müəyyən edilən qiymətində deyil, həmçinin bazarda — xüsusilə zərgərlik məhsullarında da ciddi bahalaşma müşahidə olunur.
Ekspertlər qızılın qiymətində müşahidə olunan artımı qlobal iqtisadi proseslərlə, inflyasiya riskləri və valyuta bazarlarında baş verən dəyişikliklərlə izah edirlər. Eyni zamanda, dünyada investorlardan təhlükəsiz sərmayə vasitəsi kimi qızıla olan tələbatın artması da qiymətlərin yüksəlməsinə səbəb olur.
MONETAR.AZ
