Küveyt xam neft üçün saxlama imkanlarının tükənməsi səbəbindən bəzi neft yataqlarında hasilatı azaltmağa başlayıb. Bu barədə məlumatlı mənbələrə istinadən The Wall Street Journal xəbər verir.
Mənbələrin sözlərinə görə, ölkə hasilat və emal güclərini yalnız daxili tələbatı ödəmək üçün lazım olan səviyyəyə qədər məhdudlaşdırmaq imkanını müzakirə edir. Bu daha geniş miqyaslı ixtisarlarla bağlı qərarın yaxın günlərdə qəbul ediləcəyi gözlənilir.
İranla başlayan münaqişədən sonra investorlar neftin saxlanması məsələsindən ciddi narahatdırlar. The Wall Street Journal-də yayımlanan məlumatdan sonra bazarlar dərhal reaksiya verib: neft qiymətləri daha da yüksəlib, ABŞ fond bazarlarında isə eniş qeydə alınıb.
Neft quyusunun bağlanması uzunmüddətli risklər yarada bilər. Bu, yataqlarda lay təzyiqinin zədələnməsi təhlükəsini artırır və hasilatın yenidən bərpası üçün yüksək xərclər tələb edir. Buna görə də belə addım adətən yalnız son çarə kimi atılır. Hasilatın yenidən başlanması yatağın xüsusiyyətindən asılı olaraq bir neçə gün və ya hətta həftə çəkə bilər.
İranla münaqişə səbəbindən gəmiçilik marşrutlarının iflic olması regionun böyük neft istehsalçılarını vaxt baxımından çətin vəziyyətə salıb. Səudiyyə Ərəbistanı və BƏƏ-dəki əsas neft anbarları da sürətlə dolur və hər iki ölkənin üç həftədən az müddətdə maksimum həddə çatacağı gözlənilir.
Anbarlar tam dolduqdan sonra istehsalçılar həm texniki, həm də siyasi baxımdan bahalı qərarla neft hasilatını dayandırmaq zərurəti ilə üzləşə bilərlər.
MONETAR.AZ
