Mercedes-Benz EQS modelinin növbəti restaylinqi ilə bağlı detallar açıqlanıb. Şirkətin məlumatına görə, bu model markanın tarixində ilk dəfə olaraq ənənəvi sükan əvəzinə şturval (yoke) tipli idarəetmə ilə təchiz ediləcək.
Bundan əlavə, avtomobil “steer-by-wire” adlı yeni sükan idarəetmə sistemi ilə təklif olunacaq. Bu texnologiyada sükan ilə təkərlər arasında mexaniki əlaqə yoxdur. Bütün idarəetmə elektron siqnallar vasitəsilə həyata keçirilir.
Şirkət nümayəndələrinin sözlərinə görə, bu sistemin üstünlükləri arasında sükan üzərinə ötürülən arzuolunmaz vibrasiyaların aradan qalxması və manevr zamanı daha az fiziki güc tələb olunması var. Bildirilir ki, texnologiya 1 milyon kilometr məsafədə sınaqdan keçirilib və təhlükəsizliyi təmin etmək üçün əlavə ehtiyat sistemlər tətbiq olunub. Buna baxmayaraq, istehsalçı avtomobilin idarəetməsinin dəqiq və intuitiv olaraq qaldığını vurğulayır.
Şturval tipli sükan və “steer-by-wire” sistemi opsional olaraq təqdim ediləcək. Sükanın yuxarı hissəsinin olmaması sürücüyə cihaz panelini daha yaxşı görməyə və avtomobilə minib-düşməyi asanlaşdırmağa imkan verir. Bu dizayn üçün xüsusi yeni hava yastığı da hazırlanıb.
Yenilənmiş EQS həmçinin modernləşdirilmiş info-əyləncə sistemi və qismən dəyişdirilmiş eksteryer əldə edəcək. Modelin satışa çıxarılacağı tarix hələ açıqlanmayıb.
