Beynəlxalq Valyuta Fondu (BVF) Suriya iqtisadiyyatının son aylarda bərpa prosesini sürətləndirdiyini bildirib. Fonddan verilən açıqlamada ölkədə iqtisadi fəallığın artdığı, istehlakçı və investor etimadının isə yaxşılaşdığı vurğulanıb.
BVF nümayəndə heyəti 15–19 fevral tarixlərində Suriya hökumətinin iqtisadi islahatlarını qiymətləndirmək, gələcək siyasət prioritetlərini müzakirə etmək və texniki dəstək vermək məqsədilə Dəməşqə səfər edib.
Nümayəndə heyətinin rəhbəri Ron van Rooden bildirib ki, iqtisadi fəallığın artmasına mühacirlərin geri dönüşü, elektrik təminatının yaxşılaşması, yeni investisiya layihələri və Suriya iqtisadiyyatının regional inteqrasiya prosesi dəstək verir.
BVF proqramı Suriya Maliyyə Nazirliyi və Mərkəzi Bankına dəstək verməklə yanaşı, statistik məlumatların təkmilləşdirilməsini və 4-cü Maddə konsultasiyalarının bərpasını da əhatə edir. Van Rooden qeyd edib ki, bu addımlar 2026 və sonrakı illər üçün iqtisadi artım baxımından müsbət siqnallar verir.
Mərkəzi Bankın sərt pul siyasətini qoruması və büdcənin bankdan maliyyələşmədən keçirilməsi nəticəsində inflyasiya 2025-ci ilin sonunda tək rəqəmli səviyyələrə enib, valyuta məzənnəsi isə güclənib.
Van Ruden vurğulayıb ki, yeni valyuta sisteminin tətbiqi sürətlə davam edir və indi əsas məqsəd qiymət və maliyyə sabitliyini təmin etmək, Mərkəzi Bankın müstəqilliyini qorumaq, bank sektorunu yenidən strukturlaşdırmaq və maliyyə sağlamlığını qiymətləndirməkdir.
Ümumilikdə BVF hesab edir ki, Suriya iqtisadiyyatı bərpa yolundadır və ölkənin inkişafı üçün beynəlxalq maliyyə və texniki dəstək vacibdir.
MONETAR.AZ
