Dünyada kommersiya xidmətləri ixracında Amerika Birləşmiş Ştatları və Böyük Britaniya lider mövqelərini saxlayır. Məlumat Ümumdünya Ticarət Təşkilatının statistik göstəricilərinə əsaslanır.
2024-cü ildə xidmət ticarəti hələ də yüksək dərəcədə mərkəzləşmiş olaraq qalır. Belə ki, kommersiya xidmətlərinin ən böyük 10 ixracatçı və idxalatçısı qlobal dövriyyənin 56 faizini təşkil edib.
Göstəricilərə əsasən, son on ildə ilk onluğun tərkibi dəyişməsə də, reytinqdə yerdəyişmələr baş verib. ABŞ-ın qlobal xidmət ixracındakı payı 2014-cü ildəki 14,1 faizdən 2024-cü ildə 12,8 faizə düşüb. Böyük Britaniyanın payı isə nisbətən sabit qalaraq 7,5 faizdən 7,4 faizə enib.
Eyni dövrdə İrlandiya, Hindistan və Çin əhəmiyyətli artım nümayiş etdirib. İrlandiyanın payı 2,9 faiz bəndi artaraq 6 faizə çatıb və ölkə üçüncü pilləyə yüksəlib. Bu artım ölkənin beynəlxalq xidmət mərkəzi kimi rolunun güclənməsi ilə izah olunur.
Çin 2024-cü ildə 5 faizdən bir qədər çox payla beşinci yerdə qərarlaşıb. Almaniya da oxşar göstərici ilə Çinlə yanaşı aparıcı ixracatçılar sırasında yer alıb.
Hesabatda qeyd olunur ki, xidmət ixracında artım əsasən rəqəmsal xidmətlər, maliyyə, informasiya texnologiyaları və beynəlxalq biznes xidmətləri sahəsində genişlənmə ilə bağlıdır.
MONETAR.AZ
