2026-cı ilin yanvar ayında Azərbaycanda toxuculuq, geyim, dəri və dəridən məmulatlar, ayaqqabı istehsalı sahəsində istehsal göstəriciləri həm artım, həm də yığılma problemlərini ortaya qoyub. Rəsmi rəqəmlər istehsalın artmasına baxmayaraq, anbarlarda toplanmış ehtiyatların həcminin yüksək olduğunu göstərir.
Pambıq mahlıcı istehsalı 17 253,1 ton təşkil edib və ötən ilin yanvarı ilə müqayisədə 11,4 faiz artıb. Pambıq ipliyi istehsalı 2 126,2 ton olub və 52,7 faiz yüksəlib. Pambıq parçaların istehsalı isə 2 710 min kvadrat metr olub, 3,5 faiz artım qeydə alınıb. Pambıq yataq ağlarının istehsalı 12,5 min ədəd təşkil edib, 14,7 faiz artıb. Xalça və xalça məmulatlarının istehsalı 0,4 min kvadrat metr olub, 33,3 faiz artım müşahidə edilib.
Lakin anbarlarda yığılmış ehtiyatlar istehsaldan xeyli çoxdur. Məsələn, pambıq mahlıcının anbarlarda 42 392,7 ton ehtiyatı var, pambıq ipliyi üçün isə 5 316,1 ton məhsul yığılıb. Bu, bazarda realizə prosesində ciddi ləngimə olduğuna işarədir.
Üst geyim istehsalı 87,5 min ədəd olub, 13,2 faiz artıb, anbarlarda isə 65,5 min ədəd məhsul qalıb. Alt geyim istehsalı 155,9 min ədəd təşkil edib, 72,6 faiz artım qeydə alınıb, anbarlarda 63,3 min ədəd məhsul var. Sair geyim istehsalı 688,5 min ədəd olub, 52,1 faiz artıb, anbarlarda isə 625,7 min ədəd ehtiyat mövcuddur.
İstehsalat və peşə komplektləri istehsalı 60,8 faiz azalıb və 81,9 min ədəd təşkil edib, anbarlarda 9,7 min ədəd məhsul qalıb. Corab istehsalı 429,7 min cüt olub, 286,4 faiz artıb, anbarlarda isə 7,1 min cüt məhsul yığılıb. Bu, satışın istehsal artımına tam uyğun olmadığını göstərir.
Emal edilmiş dəri istehsalı 0,3 min kvadrat metr olub və 57,1 faiz azalıb. Anbarlarda isə 137,9 min kvadrat metr məhsul var. Ayaqqabı istehsalı 75,2 min cüt təşkil edib, 72,5 faiz artıb, anbarlarda isə 128,6 min cüt məhsul yığılıb. Bu, bazara çıxarılmayan məhsulun yüksək həcmli ehtiyat yaratdığını göstərir.
Statistik göstəricilər göstərir ki, toxuculuq və geyim sahələrində istehsal artımı müşahidə olunsa da, anbarlarda yığılmış ehtiyatlar müəssisələrin məhsulu bazara vaxtında çıxarmaqda çətinlik çəkdiyini göstərir. Dəri və ayaqqabı istehsalında həm artım, həm də yığılma problemi mövcuddur ki, bu da bazar dövriyyəsinin optimallaşdırılmasına ehtiyac olduğunu ortaya qoyur.
MONETAR.AZ
