ABŞ-ın İsveçrə üçün ticarət rüsumlarını azaltmaqla bağlı razılaşması geriyə dönük qüvvəyə minəcək. Razılaşmanın elan edildiyi tarix olan 14 noyabrdan etibarən qüvvədə idi. Bu barədə Bloomberg yazır.
Rüsum dərəcəsi 39%-lik qadağanedici səviyyədən (ABŞ-ın inkişaf etmiş ölkəyə qarşı tətbiq etdiyi ən yüksək tarif) 15%-ə endiriləcək.
Yayda Donald Tramp yüksək rüsumlar tətbiq edərək İsveçrənin ixrac yönümlü iqtisadiyyatına ciddi zərbə vurmuşdu. Vəziyyət yalnız bir qrup İsveçrə milyarderinin müdaxiləsi sayəsində dəyişdi: onların Oval kabinetdə Tramp ilə görüşü zamanı ABŞ iqtisadiyyatına 200 milyard dollar investisiya yatırmaq vədi qarşılığında tariflərin endirilməsinə nail olundu.
İsveçrənin iqtisadiyyat naziri Gi Parmelen açıqlayıb ki, rüsumun azaldılması üçün Bern əlavə güzəştlərə getməyib. Yeganə şərt, İsveçrə tərəfindən də eyni tarixdən, 14 noyabrdan paralel şəkildə rüsumların endirilməsi idi.
Razılaşma çərçivəsində İsveçrə ölkə daxilində istehsal olunmayan Amerika mallarına (balıq, dəniz məhsulları, bəzi qoz növləri, tütün) rüsumları azaldır, həmçinin ABŞ-dan ət idxalı üçün kvotalar təqdim edir.
“ABŞ ilə razılaşma sayəsində İsveçrədə minlərlə iş yeri qoruna bilər”, deyə Xarici Ticarət Təşkilatının sədr müavini Lük Şnurrenberqer bildirib və əvvəlki yüksək tariflərin bir çox şirkəti iflas həddinə çatdırdığını vurğulayıb. Danışıqlar davam edir: hazırkı 15%-lik rüsum ilkin razılaşmanın bir hissəsidir. Tərəflər gələn ilin ilk rübündə razılaşmanın bütün detalları üzrə yekun razılaşma əldə etməyi planlaşdırır.
MONETAR.AZ
