Qlobal əmtəə bazarlarında kauçuk fyuçersləri artımını davam etdirərək hər kiloqram üçün 212 ABŞ sentinə yaxın səviyyədə ticarət olunub ki, bu da 2017-ci ilin fevralından bəri ən yüksək göstərici hesab olunur. Qiymət artımına əsasən neft bazarındakı möhkəmlənmə təsir edib. Analitiklər bildirirlər ki, ABŞ və İran arasında danışıqların dalana dirənməsi, eləcə də Hörmüz boğazı ətrafında davam edən gərginlik enerji qiymətlərini yüksəldib. Bu fonda xam neft bahalaşdıqca sintetik kauçukun istehsal xərcləri artır və təbii kauçukun rəqabət qabiliyyəti yüksəlir. Nəticədə təbii kauçuk qiymətlərində də artım müşahidə olunur.
Digər tərəfdən, təkliflə bağlı vəziyyət müəyyən qədər yaxşılaşıb. Belə ki, əsas istehsalçılar olan Tailand və Vyetnamda yığım mövsümünün başlaması bazara əlavə məhsul çıxarılmasına şərait yaradır. Eyni zamanda Yunnan əyalətində yağıntıların artması əvvəlki quraqlıq və istilərlə bağlı tədarük narahatlıqlarını azaldıb.
Tələb tərəfində isə fərqli dinamika müşahidə olunur. Məlumatlara görə, Çin müəssisələrinin bir çoxu 1–5 may tarixlərini əhatə edən bayram ərəfəsində ehtiyatlarını artıq formalaşdırıb. Bu isə yaxın müddətdə kauçuka olan tələbatın nisbətən zəifləməsinə səbəb ola bilər. Buna baxmayaraq, bazarda ümumi qiymət səviyyəsi hələlik yüksək olaraq qalır.
MONETAR.AZ
