Dünən inkişaf etməkdə olan bazarların aktivləri rekord səviyyədə ucuzlaşıb. Bu ölkələrin valyutaları və səhm bazarları 2020-ci ilin martında pandemiyanın pik həftəsindən bəri ən pis həftəni bağlamağa hazırlaşır, Bloomberg xəbər verir.
MSCI EM valyuta indeksi təxminən 1,4%, oxşar səhm indeksi isə 6%-dən çox ucuzlaşıb. Kütləvi satışların əsas səbəbi neft qiymətlərinin kəskin artımıdır.
İnvestorlar kütləvi şəkildə təhlükəsiz aktivlərə yönəlir, nəticədə inkişaf etməkdə olan ölkələrin bütün valyutaları ABŞ dollarına qarşı ucuzlaşıb. Əsas zərbə xalis neft idxalçıları, xüsusilə Asiya ölkələrinə dəyib, çünki daxili inflyasiyanın sürətlənməsi riski artır.
Cənubi Koreya vonası çərşənbə axşamı günü 2009-cu ildən bəri ən böyük bir günlük düşüşü yaşayıb. Bazar iştirakçıları borc yükünün məcburi azaldılması və mövqelərin ləğvi risklərinə diqqət çəkir. JPMorgan-ın inkişaf edən ölkələr valyuta volatilliyi indeksi “Böyük Yeddilik” ölkələri göstəricisini ötüb.
Filippin Mərkəzi Bankının rəhbəri Eli Remolona Jr. bildirib ki, tənzimləyici qurum enerji qiymətlərini diqqətlə izləyir. Onun sözlərinə görə, əgər neftin qiyməti barel başına 100 dollar-a çatarsa, bu, mərkəzi bankı monetar siyasəti sərtləşdirməyə məcbur edə bilər, çünki inflyasiya hədəf diapazonunu aşa bilər.
Citigroup analitikləri bildirir ki, son günlərdə riskli mövqelər əhəmiyyətli dərəcədə azaldılıb, lakin bazarda stabillik əlamətləri görünərsə, inkişaf etməkdə olan ölkələrin aktivlərini almağa qayıtmağı planlaşdırırlar.
MONETAR.AZ
