İraq neft alıcılarını Hörmüz boğazına çağırıraraq təhlükəsiz keçid vəd edir

İraq hakimiyyəti Asiyalı treyderlərə və neft emalı zavodlarına təcili müraciət edərək ölkə neftinin yüklənməsini bərpa etməyə çağırıb. Bloomberg xəbər verir ki, Bağdad tankerların İran tərəfindən Hörmüz boğazı vasitəsilə maneəsiz keçidi üçün təminat aldığını bildirir.

Bazar günü SOMO tərəfindən göndərilən rəsmi bildirişdə qeyd olunur ki, İraq nefti artıq “hər hansı potensial məhdudiyyətlərdən azaddır”. Qurum bu mövqeyini İran mediasında yayılan son məlumatlara əsaslandırıb.

Bağdad alıcılardan gəmilər və tələb olunan həcmlər daxil olmaqla yükləmə cədvəllərini təqdim etməyi istəyib və cavab üçün cəmi 24 saat vaxt verib. Həmçinin bildirilib ki, ölkənin bütün ixrac terminalları, o cümlədən Bəsrə limanı normal rejimdə fəaliyyət göstərir.

Həftəsonu İran rəsmiləri İraqın boğazdakı sərt məhdudiyyətlərdən kənar tutulduğunu açıqlasa da, bu “immunitetin” bütün yüklərə, yoxsa yalnız İraq bayrağı altında üzən tankerlərə aid olub-olmadığı dəqiqləşdirilməyib.

Bununla belə, artıq “Ocean Thunder” adlı tanker 1 milyon barel İraq nefti ilə Hörmüz boğazını uğurla keçib.

Boğazın açılması İraq üçün strateji əhəmiyyət daşıyır. Türkiyə üzərindən keçən boru kəməri istisna olmaqla, ölkənin Fars körfəzindən qlobal bazarlara çıxışı üçün alternativ marşrutları demək olar ki, yoxdur.

Boğazın bir ay əvvəl bağlanması İraq iqtisadiyyatına ciddi zərbə vurub. Mart ayında ölkənin neft ixracı 97% azalıb.

Buna baxmayaraq, Asiyalı alıcılar hələlik risk etməyə tələsmir. Neft emalı zavodları SOMO-dan İranın verdiyi təminatın şərtləri ilə bağlı daha dəqiq izahat tələb edirlər.

Əsas suallardan biri isə budur: İraq neftin daşınması üçün öz dövlət tanker donanmasını təqdim etməyə hazırdırmı? Bu, Ormuz boğazından keçid zamanı əlavə siyasi və təhlükəsizlik zəmanəti verə bilər.

MONETAR.AZ