Neft qiymətlərinin kəskin artımı Asiya iqtisadiyyatlarına ən böyük təzyiqi göstərəcək, Avropa və ABŞ isə daha mülayim iqtisadi nəticələrlə üzləşəcək. Bu barədə Morgan Stanley analitikləri məlumat veriblər.
Bank müştərilər üçün hazırladığı qeyddə bildirib ki, Asiya idxal olunan enerji resurslarından güclü asılılığı səbəbindən xüsusilə həssas olaraq qalır.
“Enerji idxalından yüksək asılılıq səbəbindən Asiya iqtisadi artım baxımından təsirə ən çox məruz qalan regiondur”, deyə Morgan Stanley qeyd edib. Bankın hesablamalarına görə, neft qiymətlərinin bir barel üçün 10 dollar davamlı artımı regionun ÜDM artımını 20–30 baza bəndi azalda bilər.
Bank əlavə edib ki, regionda inflyasiya təsirləri, ehtimal ki, idarəolunan səviyyədə qalacaq. Tam ötürülmə baş verərsə, ümumi regional İstehlak Qiymətləri İndeksinə (İQİ) təsirin təxminən 0,4 faiz bəndi olacağı gözlənilir. Bu təsirin bir hissəsi bəzi ölkələrdə tətbiq olunan subsidiyalar və tənzimlənən qiymətlər hesabına kompensasiya edilə bilər.
Bunun əksinə olaraq, ABŞ iqtisadiyyatına təsirin nisbətən məhdud olacağı gözlənilir.
Morgan Stanley hesab edir ki, neft şoku “ümumi inflyasiyanı müvəqqəti olaraq artıracaq”, lakin tarixi təcrübə göstərir ki, bu təsir baza inflyasiyasına məhdud şəkildə ötürülür.
Neft qiymətlərinin 10% davamlı artımı bir neçə ay ərzində ümumi inflyasiyanı təxminən 30 baza bəndi artıracaq, daha sonra isə bu təsir zəifləyəcək.
Bank həmçinin qeyd edib ki, enerji qiymətlərinin artımı istehlakı və ya əmək bazarını ciddi şəkildə zəiflətmədiyi halda, ABŞ-da iqtisadi artıma ümumi təsirin mülayim qalacağı ehtimal olunur.
Avropa isə daha mürəkkəb staflyasiya dinamikası ilə üzləşir. Avrozonada Morgan Stanley hesab edir ki, neftin qiymətinin bir barel üçün 10 dollar davamlı artımı ÜDM-i təxminən 15 baza bəndi azaldacaq, eyni zamanda inflyasiyanı təxminən 40 baza bəndi artıracaq və bu təsir bir neçə rüb ərzində davam edəcək.
Ümumilikdə Morgan Stanley bildirir ki, enerji şokunun əsas riski “iqtisadi artıma böyük zərbədən daha çox, artan volatillik və qeyri-müəyyənlik” ola bilər.
MONETAR.AZ
