Azərbaycanda rəsmi qeydiyyata alınmamış nikahda olan qadınlar tərəfindən doğulan uşaqların sayı ilə bağlı statistik göstəricilər açıqlanıb.
Statistika Komitəsinin məlumatına görə, son illərdə bu kateqoriyadan olan doğumların sayında azalma müşahidə olunur.
Belə ki, 2025-ci ildə rəsmi qeydiyyata alınmamış nikahda olan qadınlar tərəfindən 11 626 uşaq dünyaya gətirilib. Onlardan 4 599-u şəhər yerlərində, 7 027-si isə kənd yerlərində doğulub.
2024-cü ildə bu göstərici 13 228 uşaq təşkil edib. Beləliklə, bir il ərzində rəsmi nikahda olmayan qadınlar tərəfindən doğulan uşaqların sayı 1 602 nəfər azalıb.
Statistik göstəricilərə nəzər saldıqda, bu kateqoriya üzrə doğumların ən yüksək səviyyəsi 2011-ci ildə qeydə alınıb. Həmin il rəsmi qeydiyyata alınmamış nikahda olan qadınlar tərəfindən 30 983 uşaq doğulub. Onların 12 970-i şəhər, 18 013-ü isə kənd yerlərinin payına düşüb.
Sonrakı illərdə göstəricidə ümumi azalma müşahidə edilib. 2016-cı ildə 26 288, 2019-cu ildə 21 453, 2020-ci ildə 17 714, 2021-ci ildə 17 566, 2022-ci ildə 18 814, 2023-cü ildə 15 622, 2024-cü ildə 13 228, 2025-ci ildə isə 11 626 uşaq bu kateqoriyada qeydə alınıb.
Beləliklə, 2011-ci ildən 2025-ci ilədək rəsmi qeydiyyata alınmamış nikahda olan qadınlar tərəfindən doğulan uşaqların sayı 19 357 nəfər azalıb.
2025-ci ildə bu uşaqların 7 027-si kənd yerlərində, 4 599-u isə şəhərlərdə doğulub. Başqa sözlə, həmin il rəsmi nikahda olmayan qadınlar tərəfindən doğulan uşaqların təxminən 60,4 faizi kənd yerlərinin, 39,6 faizi isə şəhər yerlərinin payına düşüb.
Monetar.az
