Dünyada ən çox kənd təsərrüfatı torpağına malik ölkələrin siyahısı açıqlanıb. Son məlumatlara görə, bu göstərici üzrə Çin birinci yerdə qərarlaşıb.
Reytinq BMT-nin Ərzaq və Kənd Təsərrüfatı Təşkilatının (FAO) məlumatları əsasında hazırlanıb və Dünya Bankı tərəfindən toplanmış son statistikaya əsaslanır.
Məlumata görə, Çində kənd təsərrüfatı torpaqlarının sahəsi təxminən 2 milyon kvadrat mil təşkil edir ki, bu da dünyada ən böyük göstəricidir. Ölkədə əhalinin təxminən beşdə biri kənd təsərrüfatı sektorunda çalışır və Çin hazırda dünyanın ən böyük kənd təsərrüfatı məhsulu istehsalçılarından və istehlakçılarından biridir.
Siyahıda ikinci yerdə ABŞ (1,63 milyon kvadrat mil), üçüncü yerdə isə Avstraliya (1,4 milyon kvadrat mil) qərarlaşıb. İlk beşliyi həmçinin Braziliya (914 min kvadrat mil) və Rusiya (833 min kvadrat mil) tamamlayır.
İlk onluqda bundan əlavə Qazaxıstan, Hindistan, Səudiyyə Ərəbistanı, Argentina və Sudan da yer alır.
Ekspertlərin fikrincə, böyük əraziyə malik bəzi ölkələrdə – məsələn, Rusiyada və Kanadada – iqlim şəraiti və geniş tundra sahələri kənd təsərrüfatı torpaqlarının ümumi payını məhdudlaşdırır.
Araşdırmada qeyd olunur ki, Asiya və Afrika regionları kənd təsərrüfatı torpaqlarının sahəsinə görə siyahıda geniş təmsil olunub. Afrikada xüsusilə Sudan, Cənubi Afrika və Nigeriya kimi ölkələr bu sahədə öndə gedir.
Mütəxəssislər bildirirlər ki, iqlim dəyişiklikləri gələcəkdə qlobal kənd təsərrüfatı xəritəsini dəyişə bilər. Temperaturun artması nəticəsində şimal bölgələrində yeni əkin sahələrinin yaranması mümkün olsa da, bəzi regionlarda səhralaşma və torpaq eroziyası kənd təsərrüfatı torpaqlarının azalmasına səbəb ola bilər.
MONETAR.AZ
