Qızılın qiyməti Yaxın Şərqdə müharibənin yaratdığı enerji təchizatı riskləri fonunda artıb. Buna səbəb kimi Beynəlxalq Enerji Agentliyi (IEA) tərəfindən indiyədək ən böyük həcmdə strateji neft ehtiyatlarının bazara buraxılması planının nəzərdən keçirilməsi barədə yayılan məlumat göstərilir.
Məlumata görə, külçə qızılın qiyməti əvvəlki sessiyada təxminən 1 faiz artdıqdan sonra bir unsiya üçün 5 200 ABŞ dollarını ötüb. The Wall Street Journal qəzetinin yazdığına əsasən, IEA-nın müzakirə etdiyi plan 2022-ci ildə Rusiyanın Ukraynaya müdaxiləsi hadisəsindən sonra bazara çıxarılan 182 milyon barrel həcmdən daha çox neftin sərbəst buraxılmasını nəzərdə tutur.
Bu arada, ABŞ və İsrailin İrana qarşı hərbi əməliyyatlarının 12-ci gününə keçməsi bazarlarda qeyri-müəyyənliyi artırıb. ABŞ rəsmilərinin açıqlamaları isə bir-biri ilə ziddiyyət təşkil edib. Ağ Ev Hörmüz boğazı vasitəsilə hərəkət edən neft tankerinə ABŞ-ın müşayiət etmədiyini bildirib. Halbuki ABŞ-ın energetika naziri Kris Rayt sosial şəbəkədə sonradan silinən paylaşımında fərqli məlumat vermişdi.
Qeyd olunur ki, dünya üzrə neft və mayeləşdirilmiş təbii qaz tədarükünün təxminən beşdə biri məhz bu boğazdan keçir. Hazırda bölgədə gəmi hərəkəti demək olar ki, dayanıb.
Enerji bazarlarında kəskin dalğalanma inflyasiya ilə bağlı narahatlıqları da artırıb. Bu isə ABŞ Federal Ehtiyat Sistemi və digər mərkəzi bankların faiz endirimləri ilə bağlı gözləntiləri zəiflədə bilər. Yüksək faiz dərəcələri isə adətən faiz gəliri gətirməyən qiymətli metallara mənfi təsir göstərir.
Digər tərəfdən, müharibə başlayandan sonra qızıl üzrə birja fondlarından çıxışlar müşahidə olunur. Bloomberg-in məlumatına görə, ötən həftə qızıl ETF-lərində saxlanılan aktivlər təxminən 30 ton azalaraq son iki ildən çox müddətdə ən böyük həftəlik geriləməni qeydə alıb.
Bununla belə, qızıl geosiyasi gərginlik və qlobal ticarətdə qeyri-müəyyənlik dövründə ənənəvi “təhlükəsiz liman” aktivlərindən biri kimi investorların marağını qoruyur.
Hazırda spot qızılın qiyməti Sinqapur vaxtı ilə saat 09:39-a olan məlumata görə 0,5 faiz artaraq bir unsiya üçün 5 217,50 ABŞ dollarına çatıb. Gümüş 0,4 faiz artaraq 88,67 dollara yüksəlib. Platin və palladium da bahalaşıb, dollar indeksi isə təxminən 0,1 faiz azalıb.
MONETAR.AZ
