G7 ölkələri neft tədarükündə mümkün problemləri aradan qaldırmaq və bazardakı volatilliyi azaltmaq üçün strateji neft ehtiyatlarından istifadə etməyə hazır olduqlarını bildiriblər. Bu barədə Bloomberg məlumat yayıb.
G7 ölkələrinin enerji nazirləri Beynəlxalq Enerji Agentliyi (IEA) nümayəndələri ilə videokonfrans keçirərək İran ətrafındakı münaqişənin qlobal enerji bazarlarına və tədarük zəncirlərinə təsirini müzakirə ediblər.
Nazirlərin yaydığı bəyanatda deyilir: “IEA ilə sıx əməkdaşlıq çərçivəsində enerji bazarındakı tendensiyaları diqqətlə izləyir və həm G7 daxilində, həm də beynəlxalq tərəfdaşlarımızla fəaliyyətimizi koordinasiya edirik.”
Bəyanatda həmçinin qeyd olunub ki, ölkələr bazarın sabitləşdirilməsi üçün proaktiv tədbirlərin görülməsini prinsipial olaraq dəstəkləyirlər. Bu tədbirlərə strateji neft ehtiyatlarının istifadəsi də daxildir.
Buna baxmayaraq, bazarlarda qiymətlər artmaqda davam edir.
-
Brent crude markalı neft üzrə fyuçerslər 2,2% artaraq 89,72 dollar/barel səviyyəsinə yüksəlib.
-
WTI crude fyuçersləri isə 2,5% bahalaşaraq 85,55 dollar/barel olub.
Analitiklər hesab edir ki, Yaxın Şərqdəki geosiyasi gərginlik davam etdiyi müddətdə neft bazarında volatillik yüksək qalacaq.
MONETAR.AZ
