Gəncə Cihazqayırma Zavodu ASC 2025-ci il üzrə maliyyə hesabatlarını açıqlayıb. Audit olunmuş hesabatlara əsasən, müəssisə hesabat ilini 3 milyon 323 min 689 manat xalis mənfəətlə başa vurub. Bu göstərici əvvəlki illə müqayisədə 431,8 min manat və ya təxminən 14,9% çoxdur.
Maliyyə hesabatına görə, zavodun əsas əməliyyat gəlirləri 2025-ci ildə 37 milyon 244 min 515 manat təşkil edib. Bu, 2024-cü illə müqayisədə 31,4% artım deməkdir. Satışın maya dəyəri üzrə xərclər 32 milyon 475 min 548 manat olub və nəticədə müəssisənin ümumi mənfəəti 4 milyon 768 min 967 manata yüksəlib.
İnzibati və digər əməliyyat xərcləri çıxıldıqdan sonra əməliyyat mənfəəti 4 milyon 156 min 126 manat təşkil edib. Mənfəət vergisi üzrə 832 min 437 manat ödənişdən sonra xalis mənfəət 3 milyon 323 min 689 manat səviyyəsində formalaşıb.
Şirkətin aktivləri il ərzində əhəmiyyətli dərəcədə artaraq 13 milyon 989 min 857 manatdan 23 milyon 176 min 38 manata yüksəlib. Aktivlərin əsas hissəsini 21 milyon 524 min 489 manat həcmində qısamüddətli aktivlər təşkil edib. Xüsusilə qısamüddətli debitor borcları 14 milyon 19 min 438 manata çataraq əvvəlki illə müqayisədə kəskin artım göstərib.
2025-ci il dekabrın 31-nə müəssisənin cəmi kapitalı 14 milyon 382 min 840 manat olub ki, bu da əvvəlki ilin sonu ilə müqayisədə 21,7% çoxdur. Bölüşdürülməmiş mənfəət isə 12 milyon 881 min 663 manata yüksəlib.
Öhdəliklər də artaraq 2 milyon 175 min 428 manatdan 8 milyon 793 min 198 manata çatıb. Bunun əsas səbəbi 3 milyon manat məbləğində qısamüddətli faiz xərcləri yaradan öhdəliklərin və eyni həcmdə sair qısamüddətli öhdəliklərin yaranması olub.
Pul vəsaitlərinin hərəkəti hesabatına əsasən, müəssisənin ilin sonuna pul vəsaitləri və onların ekvivalentləri 561 min 137 manat təşkil edib. Bu göstərici 2024-cü ilin sonundakı 2 milyon 277 min 219 manatla müqayisədə 75,4% azdır. Əməliyyat fəaliyyətindən 3 milyon 583 min manat məbləğində xalis pul çıxışı qeydə alınıb ki, bu da əsasən debitor borclarının artması ilə bağlı olub.
2025-ci ildə səhmdarlara 755 min 277 manat dividend ödənilib.
MONETAR.AZ
