Əgər Avropa İttifaqı Rusiyaya ikili təyinatlı malların guya re-ixracı ilə bağlı Qırğızıstana qarşı sanksiyalar tətbiq edərsə, Bişkek bu qərarı məhkəmədə apelyasiya verəcək. Bu barədə Financial Times qəzetinə Qırğızıstan hökuməti sədrinin birinci müavini Daniyar Amangeldiyev bildirib.
Avropa Komissiyası hərbi məqsədlərlə istifadə oluna bilən ikili təyinatlı malların Qırğızıstana tədarükünə qadağa qoymağı nəzərdən keçirir. FT-nin tanış olduğu sənədlərə görə, Brüssel Bişkekin bu malları Moskvaya re-ixrac etdiyini düşünür. 2022-ci ildə Ukraynada müharibə başlayandan bəri Aİ-dən Qırğızıstana idxal təxminən 800% artıb, Qırğızıstandan Rusiyaya ixrac isə 1 200% yüksəlib ki, bu da sənədlərdə “sanksiyalardan yayınma riskinin yüksəkliyi” kimi qiymətləndirilir.
Amangeldiyev Aİ-dən idxalın artımını tərəflər arasında bağlanmış iri müqavilələrlə izah edib; məsələn, onlardan biri ölkədə su elektrik stansiyasının tikintisini nəzərdə tutur. O, eyni zamanda Qırğızıstandakı bəzi şirkətlərin ikili təyinatlı malları Rusiyaya re-ixrac etdiyini etiraf edib, lakin sanksiyaların bütün dövlətə şamil edilməsinə razılaşmayıb. Onun fikrincə, məhdudiyyətlər ünvanlı olmalı və konkret şəxslərə yönəlməlidir.
“Biz bu münaqişənin başlanmasını dəstəkləmirik. Buna görə də qadağan olunmuş malların ticarətinə qarşıyıq”, deyə Amangeldiyev vurğulayıb. Onun sözlərinə görə, fevral ayında Bişkek Aİ-yə ölkənin sanksiya tələblərinə necə əməl etdiyini ətraflı izah edən sənədlər göndərib.
Aİ tərəfi isə Qırğızıstanın Rusiyaya qarşı sanksiyaları icra etməsinin yetərli olmadığını bildirib. “Biz Qırğızıstandan Rusiya ilə ticarəti dayandırmağı istəmirik. Biz sanksiyalardan yayınmadan ticarət aparılmasını istəyirik”, deyə cümə axşamı, 26 fevral tarixində Aİ-nin sanksiyalar üzrə xüsusi nümayəndəsi David O’Sullivan qeyd edib.
Bundan əvvəl Bloomberg mənbələri Aİ-nin Rusiyaya qarşı 20-ci sanksiyalar paketi çərçivəsində Qırğızıstana məhdudiyyətlər tətbiq etməyi planlaşdırdığını yazmışdı. Daha əvvəl FT Avropa Komissiyasının daxili sənədinə istinadla Rusiyalı kontragentlərlə kriptovalyuta əməliyyatlarının tam qadağan edilməsini, 20 Rusiya bankına və üçüncü ölkələrdən olan bir sıra maliyyə təşkilatlarına sanksiyalar tətbiqini də gündəmə gətirdiyini bildirmişdi.
Reuters-in məlumatına görə, siyahıya Rusiyaya kriptoaktivlərlə bağlı xidmətlər göstərdiklərinə görə iki Qırğızıstan bankı — Keremet Bank və Capital Bank of Central Asia, eləcə də Laos və Tacikistandan olan banklar daxil edilə bilər.
