Azərbaycanın xarici ticarətində

Azərbaycanın xarici ticarətində dalğalanmalar

18 İyul 2025 01:22

Azərbaycanın xarici ticarət dövriyyəsi bu ilin 6 ayında əhəmiyyətli dəyişikliklərə məruz qalsa da, ölkə ümumilikdə 1 milyard 350 milyon dollardan çox ticarət profisiti ilə dövrü başa vurub. Dövlət Gömrük Komitəsinin məlumatına görə yanvar-iyun aylarında Azərbaycanın ixracı 12 milyard 880 milyon dollar, idxalı isə 11 milyard 520 milyon dollar təşkil edib. Ümumi ticarət dövriyyəsi isə 24 milyard 400 milyon dollar səviyyəsində qeydə alınıb.

Yanvar ayı ixracın ən yüksək olduğu ay olub, 3 milyard dollardan çox ixrac qeydə alınıb. İdxal da yüksək səviyyədə olsa da, yanvar ayında ölkə 986 milyon dollardan çox müsbət ticarət saldosuna nail olub.
Fevral ayında ixracda kəskin azalma müşahidə edilib, bu da 357 milyon 500 min dollarlıq mənfi saldoya (ticarət defisitinə) səbəb olub. Bu ay idxal ixracı üstələyib.
Mart ayında ticarət balansı yenidən müsbətə dönüb, ixrac 1 milyard 619 milyon dollar, idxal isə 1 milyard 525 milyon dollar səviyyəsində olub.
Aprel ayında ixracda canlanma müşahidə olunsa da, idxalın kəskin artması (2 milyard 470 milyon dollar) nəticəsində yenidən 71 milyon dollarlıq cüzi mənfi saldo yaranıb. Aprel ayı həm də cari ilin ilk altı ayında ən yüksək idxal həcminə malik olub.
May və iyun aylarında isə xarici ticarət ardıcıl olaraq müsbət saldo ilə yekunlaşıb. May ayında ixrac 2 milyard 216 milyon dollar, idxal 1 milyard 831 milyon dollar, iyun ayında isə ixrac 1 milyard 876 milyon dollar, idxal 1 milyard 557 milyon dollar təşkil edib. Bu aylarda müvafiq olaraq 384 milyon 500 min dollar və 319 milyon 700 min dollar ticarət profisiti əldə olunub.

Aylıq göstəricilərdəki ciddi dalğalanmalar xüsusilə fevral və aprel aylarındakı ticarət defisitləri, ticarət balansının dayanıqlığını təmin etmək üçün bəzi sahələrdə diqqətin artırılmasının vacibliyini göstərir.

Mütəxəssislər bildirir ki, bu cür dalğalanmalar qlobal bazar qiymətləri, mövsümi amillər və ya müəyyən iri idxal əməliyyatları ilə bağlı ola bilər. Azərbaycanın gələcək aylardakı xarici ticarət dinamikası ölkə iqtisadiyyatının ümumi gedişatını qiymətləndirmək üçün vacib göstərici olacaq.