Azərbaycan meyvə-tərəvəzi xaricə

Azərbaycan meyvə-tərəvəzi xaricə neçəyə satır?

18 İyul 2025 01:32

2025-ci ilin ilk altı ayında Azərbaycanın kənd təsərrüfatı məhsullarının, xüsusilə meyvə və tərəvəzlərin ixracı ölkənin qeyri-neft sektoru üzrə ticarət göstəricilərində mühüm yer tutub. Dövlət Gömrük Komitəsinin təqdim etdiyi məlumatlara əsasən, yanvar–iyun ayları ərzində meyvə-tərəvəz ixracının ümumi dəyəri 415 milyon 753 min ABŞ dolları, ixrac həcmi isə 402 min 396 ton təşkil edib.

Təqdim olunan statistik göstəricilər əsasında hesablanmış 1 kiloqram üzrə orta ixrac qiymətləri aşağıdakı kimidir:

Pomidor – 1 kiloqram üçün 1 manat 89 qəpik
Kartof – 68 qəpik
Meşə fındığı – 12 manat 10 qəpik
Alma – 1 manat 19 qəpik
Xurma – 1 manat 22 qəpik
Nar – 1 manat 46 qəpik
Çay – 15 manat 33 qəpik

İxrac qiymətlərinə görə ilk yeri çay tutur. Belə ki, Azərbaycan istehsalı olan çay xarici bazarlarda orta hesabla 15 manatdan çox qiymətə realizə olunub. Çayın ardınca meşə fındığı gəlir – bu məhsulun 1 kiloqramı 12 manatdan artıq satılıb.

Pomidor həm miqdara, həm də dəyərə görə Azərbaycanın meyvə-tərəvəz ixracında lider mövqeyini qoruyur. Bu məhsulun 1 kiloqramı xarici bazarlarda 1 manat 89 qəpik qiymətə satılıb. Kartof isə nisbətən aşağı dəyərli məhsul olaraq qalır – ixrac qiyməti 68 qəpik təşkil edib.

Ekspertlər hesab edirlər ki, yüksək ixrac qiymətləri məhsulun keyfiyyəti, logistika imkanları, bazar tələbi və brendləşmə strategiyaları ilə birbaşa bağlıdır. Əsas bazarlar sırasında Rusiya, BƏƏ, Gürcüstan və bir sıra Avropa ölkələri yer alır.

Qeyd edək ki, meyvə-tərəvəz məhsulları ölkənin qeyri-neft ixracında 23,7 faiz paya malik olmaqla, aqrar sektorun inkişafında strateji rol oynayır.

MONETAR.AZ