BVF: Güclü pul siyasəti

BVF: Güclü pul siyasəti dayanıqlığı artırıb

7 Oktyabr 2025 08:41

Beynəlxalq Valyuta Fondu (BVF) güclü maliyyə və pul siyasəti çərçivələrinin, eləcə də inkişaf etmiş yerli valyutada borclanma bazarlarının inkişaf etməkdə olan iqtisadiyyatların qlobal maliyyə şoklarına qarşı dayanıqlığını dəstəklədiyini bəyan edib.

BVF tərəfindən “Dünya İqtisadi Görünüşü” və “Qlobal Maliyyə Sabitliyi” hesabatlarının analitik hissələri dərc edilib.

“Dünya İqtisadi Görünüşü” hesabatının inkişaf etməkdə olan bazarların dayanıqlığına həsr olunmuş hissəsində bu ölkələrin son illərdə riskdən qaçınma şoklarına qarşı əhəmiyyətli dərəcədə dayanıqlıq nümayiş etdirdiyi qeyd olunur.

Hesabatda vurğulanır ki, əlverişli xarici şərtlər bu dayanıqlığa töhfə versə də, siyasət çərçivələrindəki təkmilləşmələr inkişaf etməkdə olan bazarların riskdən qaçınma şoklarına dözmək qabiliyyətini gücləndirməkdə mühüm rol oynayıb.

“Qlobal Maliyyə Sabitliyi” hesabatının inkişaf etməkdə olan iqtisadiyyatların borclanma bazarlarındakı dəyişikliklərin araşdırıldığı hissəsində isə güclü təməllərə malik bir çox inkişaf etməkdə olan ölkənin yerli valyuta ilə istiqrazlar buraxa bildiyi və beynəlxalq alıcıların marağının aşağı olduğu şəraitdə yeni daxili alıcılar tapdığı qeyd edilib.

Yerli valyuta ilə istiqraz buraxılışına doğru bu tendensiyanın dayanıqlığı dəstəklədiyi bildirilir. Hesabatda qeyd olunur ki, yerli valyutada borclanma payı daha yüksək və investor bazası daha şaxələnmiş olan inkişaf etməkdə olan iqtisadiyyatlar qlobal stress dövrlərində daha sabit istiqraz gəlirliliyi və bazar likvidliyi təmin ediblər.

Qeyd olunur ki, əvvəllər riskdən qaçınma dövrləri inkişaf etməkdə olan bazarlara xüsusilə sərt təsir göstərsə də, son dövrlərdə bu mənzərə əhəmiyyətli dərəcədə dəyişib. Bir çox inkişaf etməkdə olan iqtisadiyyat qlobal risk iştahındakı dalğalanmaları əvvəlki dövrlərə nisbətən daha yaxşı adlada bilib, nəticədə kapital axınları daha az, borclanma xərcləri daha nəzarətli olub, böyümə daha stabil və inflyasiya daha aşağı səviyyədə seyr edib.

BVF-nin blog yazısında etibarlı pul siyasəti, daha müstəqil mərkəzi banklar və daha şəffaf fiskal siyasət kimi təkmilləşdirilmiş siyasət çərçivələrinin mühüm rol oynadığı ifadə olunub.

MONETAR.AZ